बोदवड बाजार समितीला कुलूप ठोकण्याचा इशारा अन् सुरू झाले लिलाव

Bodwad market committee warned to lock and auction started बोदवड : बोदवड शहरात बाजार समिती असूनही शेतकर्‍यांकडील मालाचा लिलाव होत नसल्याची ओरड होत होती. त्याचा खुद्द अनुभव शिवसेनेचे तालुका संघटक शांताराम कोळी यांना गुरुवारी आला. शेतीचा कृषी माल बाजार समितीत आणल्यानंतरही कुणीही दाद देत नसल्याने त्यांनी ही बाब आमदार चंद्रकांत पाटील यांच्या कानावर टाकली. आमदार तडका-फडकी दुपारी बाजार समितीत दाखल झाले व त्यांनी शेतमालाची खरेदी-विक्री सुरू करा अन्यथा बाजार समितीला कुलूप लावतो, असा इशारा देताच यंत्रणा हलली व शेती मालांच्या लिलावाला सुरवात झाली. व्यापार्‍यांनी दुपारी लिलाव पद्धत्तीने हरबर्‍याची बोली लावल्याने शेतकर्‍यांनी समाधान व्यक्त केले.

सुविधा पुरवण्याचा केवळ बनाव !
गेल्या काही महिन्यांपासून बोदवड बाजार समितीत शेती मालाची खरेदी-विक्री सुरू व्हावी यासाठी शिवसेनेचे तालुका संघटक शांताराम कोळी हे सातत्याने पाठपुरावा करीत होते मात्र बाजार समितीत शेतकरी मालाची खरेदी-विक्री सुरू असून शेतकर्‍यांना सर्व प्रकारच्या सुविधा पुरवल्या जात असल्याचा दावा करण्यात येत होता. गुरुवारी शिवसेना तालुका संघटक शांताराम कोळी यांनी त्यांचा शेती उत्पादित शेतीमाल कृषी उत्पन्न बाजार समितीत विक्रीसाठी आणला असता यावेळी कुणीही आडत्या-व्यापारी उपलब्ध नव्हते. शेती माल उठविण्यासाठी हमाल नसल्याने शांताराम कोळी व त्यांचा मुलगा प्रज्वल कोळी यांनी हरबरा माल बाजार समितीच्या ओट्यावर आणला. पाच तास होवूनही दखल घेतली जात नसल्याने आमदारांना हा प्रकार कळवण्यात आला.