A leopard that killed a grandmother and her grandson in Taloda taluka is finally in the forest department’s net तळोदा (21 ऑगस्ट 2024) : नरभक्षक बिबट्याला जेरबंद करण्यास वनविभागाला यश आले आहे. तळोदा तालुक्यातील काजीपूर शिवारात मंगळवारी या बिबट्याने आठ वर्षीय नातवासह 50 वर्षीय आजीचा बळी घेतला होता. त्यानंतर वनविभागाने बिबट्याला जेरबंद करण्यासाठी सापळा रचल्यानंतर त्यात तो अडकला. दरम्यान, आणखी दोन बिबटे या भागात फिरत असल्याने शेतकरी, शेतमजूर धास्तावले आहेत.
दोघांच्या बळीने समाजमन संतप्त
तळोदा तालुक्यातील काजीपूर शिवारात अतुल सूर्यवंशी यांच्या शेतात भगदरी येथील कुटुंब रखवालदार म्हणून काम करत होते. नेहमीप्रमाणे साखराबाई खेमा तडवी (50) या मंगळवारी दुपारी दोन वाजेच्या सुमारास शेळ्या चारण्यासाठी गेल्या होत्या. बराच उशीर झाला मात्र आजी घराकडे परतली नसल्याचे पाहून त्यांची मुलगी व श्रावण हे साखराबाई यांच्या शोधात शेताकडे निघाले. शेताकडे येताच दबा धरून बसलेल्या बिबट्याने श्रावणवर हल्ला चढवला व त्याला ओढून बाजूच्या उसाच्या शेतात नेले. ही घटना पाहून ग्रामस्थांनी आरडाओरड केला.
दुपारी चढवला हल्ला
मुलाला बिबट्या घेऊन गेल्यानंतर पुन्हा आजी साखराबाईचा शोध घेतला असता, त्याचा मृतदेहच आढळला. बिबट्याने साखराबाईचे मानेपासून वरचे डोके व छातीचा अर्धा भाग खाऊन नष्ट केला होता. साखराबाईवर बिबट्याने दुपारी एक ते दोन वाजण्याच्या दरम्यान हल्ला केला असल्याचा अंदाज वन विभागाकडून वर्तवण्यात आला आहे. दुसरीकडे श्रावणला वाचवण्यातही यश आले नाही. त्याच्या मानेवर व डोक्यावर बिबट्याच्या हल्ल्यात खोलवर जखमा झाल्याने रक्तस्त्राव अधिक झाल्याने त्याचा मृत्यू झाला.
पहाटे पिंजर्‍यात अडकला बिबट्या
घटनेनंतर वनविभागाने तात्काळ हालचाली सुरु केल्या. पिंजरा लावला व रात्रभर वन विभागाचे कर्मचारी यांनी पहारा ठेवला. अखेर पहाटे बिबट्या पिंजरामध्ये जेरबंद झाला. मात्र, आणखी दोन बिबटे पिंजरा भोवती फिरत होते असे परिसरातील शेतमळ्यातील रखवाली करणारे म्हणाले.
वनविभागाने बुधवार, 21 रोजी पिंजर्‍यात अडकलेल्या बिबट्याला पहाटे सात वाजेदरम्यान घटना स्थळावरून अज्ञातस्थळी हलवले.
