प्रतिष्ठा महिला मंडळाच्या उद्योजक मेळाव्यातून महिला होणार स्वावलंबी

भुसावळ (26 ऑक्टोबर 2024) : महिला उद्योजक मेळाव्यात शहरासह तालुक्यातील विविध बचत गटाच्या महिलांसह स्वयंरोजगार निर्माण करणार्‍या महिलांच्या हाताला मोठ्या प्रमाणावर रोजगार उपलब्ध झाला आहे. प्रतिष्ठा महिला मंडळाचा सलग 12 वर्षांपासून सुरू असलेला उपक्रम कौतुकास्पद असल्याचे मत भुसावळात डॉ.संगीता बियाणी व डॉ.नीलिमा नेहते यांनी व्यक्त केले. शहरातील ब्राह्मण संघात तीन दिवसीय मेळाव्याचे शनिवारी त्यांच्याहस्ते उद्घाटन झाले. याप्रसंगी त्या बोलत होत्या.

स्थानिक वस्तूंना मिळाली बाजारपेठ
महिला उद्योजक मेळाव्यात दिवाळी सणाला लागणार्‍या विविध वस्तू एकाच दालनाखाली उपलब्ध झाल्या आहेत त्यामुळे ग्राहकांना दिवाळी पदार्थ असो वा सजावटीचे साहित्य हे एकाच छताखाली ब्राह्मण संघात उपलब्ध होईल व शहराची मोठी बाजारपेठ महिलांना या मेळाव्यातून उपलब्ध झाल्याने आयोजकांचे मान्यवरांनी भाषणात तोंड भरून कौतुक केले. सणा-सुदीच्या काळात महिलांच्या हाताला रोजगार मिळाला असून त्या माध्यमातून त्या स्वावंलबीदेखील झाल्याचे दोन्ही मान्यवरांनी मनोगतातून सांगितले.

शहरवासीयांनी एक वेळ भेट द्यावी
शहरातील प्रतिष्ठा महिला मंडळातर्फे दरवर्षाप्रमाणे 26 ते 28 ऑक्टोबर या काळात ब्राह्मण संघात तीन दिवसीय महिला मेळावा सुरू आहे. या मेळाव्यात दिवाळी सणासाठी लागणार्‍या पणतीपासून ते घर सजावटीचे साहित्य व दिवाळीसाठीचे विविध फराळाचे साहित्य माफक दरात उपलब्ध करून देण्यात आले आहे. शहरातील नागरिक व महिलांनी या मेळाव्याला भेट द्यावी, असे आवाहन प्रतिष्ठा महिला मंडळाच्या अध्यक्ष रजनी सावकारे यांनी यावेळी केले. मेळावा यशस्वीतेसाठी महिला मंडळाचे सर्व पदाधिकारी परिश्रम घेत आहेत.

डॉ.सुवर्णा गाढेकर यांचा सन्मान
भुसावळ  शहरातील प्रथितयश महिला प्रसुती रोग तज्ज्ञ डॉ.सुवर्णा गाढेकर यांचा प्रतिष्ठा महिला मंडळातर्फे एमआरसीओजी या अत्यंत काठीण्य पातळीवरील परीक्षेत यश मिळवल्याने सत्कार करण्यात आला. मंडळाच्या अध्यक्षा रजनी सावकारे, डॉ.संगीता बियाणी व डॉ.नीलिमा नेहते यांच्याहस्ते सत्कार करण्यात आला. भुसावळातील स्त्री रोग तज्ज्ञ डॉ.सुवर्णा गाढेकर यांनी इंग्लडमध्ये प्रसुतीतज्ज्ञ म्हणून काम करण्यासाठी आवश्यक असलेली एमआरसीओजी ही अत्यंत प्रतिष्ठीत व काठिण्यपूर्व परीक्षा तीन पातळीवर उत्तीर्ण केल्याने आता त्यांना 13 देशांमध्ये वैद्यकीय सेवा करण्याची संधी मिळणार आहे शिवाय आपल्याकडील रुग्णांना जागतिक दर्जाचे ज्ञान मिळवल्याने सेवा अधिक सुलभरित्या देता येणे शक्य झाले आहे.