बालाघाट (19 फेब्रुवारी 2025) : मध्यप्रदेशातील नक्षलग्रस्त क्षेत्र असलेल्या गढ़ी पोलीस ठाण्याच्या हद्दीतील रौंडा जंगलात चकमकीनंतर चार महिला नक्षलवादी ठार झाल्या. अनेक शस्त्रे आणि इतर साहित्यही पोलिसांनी जप्त केले.
काय घडले जंगलात
पोलीस आणि हॉक फोर्सचे जवान रोंडा येथील घनदाट जंगलात शोधमोहिम राबवत असताना नक्षलवाद्यांनी पोलिस दलावर गोळीबार सुरू केला. जवानांनी लगेच प्रत्युत्तर दिले. ज्यात चार महिला नक्षलवादी ठार झाल्या. ठार झालेल्या नक्षलवाद्यांकडून एक इन्सास रायफल, एक एसएलआर रायफल आणि एक 303 रायफल जप्त करण्यात आाली. वरिष्ठ पोलीस अधिकारी घटनास्थळी पोहोचले आणि परिस्थितीचा आढावा घेतला.
काही नक्षलवादीही जखमी झाले मात्र त्यांनी घनदाट जंगलाचा फायदा घेत पळ काढला. जखमी नक्षलवाद्यांचा शोध घेण्यासाठी पोलिसांनी जंगलात मोठ्या प्रमाणावर शोधमोहीम सुरू केली. या कारवाईत पोलिसांनी हॉक फोर्स, सीआरपीएफ, कोब्रा कमांडो आणि जिल्हा फोर्सचा समावेश केला होता. फरार नक्षलवाद्यांना पकडता यावे यासाठी एकूण 12 हून अधिक पथकांकडून शोधमोहीम राबविण्यात येत आहे.
