Earthquake in Myanmar नायपिडॉ (29 मार्च 2025) : म्यानमारमध्ये शुक्रवारी शक्तशाली भूकंप झाल्यानंतर सुमारे दहा हजाराहून अधिक नागरिकांचा मृत्यू झाल्याची भीती आहे. हा अंदाज युनायटेड स्टेट्स जिओलॉजिकल सर्व्हेने मांडला आहे. भूकंपाचे धक्के थायलंड, बांगलादेश, चीन आणि भारतापर्यंत जाणवले.
म्यानमारच्या लष्करी सरकारने किमान 800 लोकांचा मृत्यू झाल्याची पुष्टी केली आहे तर दोन हजार लोक जखमी झाले आहेत. दुसरीकडे, थायलंडमध्ये 10 जणांचा मृत्यू झाला आहे.
शुक्रवारी सकाळी 11:50 वाजता म्यानमारमध्ये 7.7 तीव्रतेचा भूकंप झाला. म्यानमार आणि थायलंडमध्ये गेल्या 200 वर्षांतील हा सर्वात मोठा भूकंप आहे. मोठ्या प्रमाणात झालेल्या विध्वंसामुळे म्यानमारच्या 6 राज्यांमध्ये आणि संपूर्ण थायलंडमध्ये आणीबाणी लागू करण्यात आली आहे.
म्यानमार, थायलंड, बांगलादेश, भारत आणि नैऋत्य चीनसह 5 देशांमध्ये याचा परिणाम दिसून आला. येथील अनेक भागात जोरदार भूकंपाचे धक्के जाणवले. पीटीआय वृत्तसंस्थेने दिलेल्या वृत्तानुसार, भारतातील कोलकाता, इंफाळ, मेघालय आणि ईस्ट कार्गो हिलमध्ये भूकंपाचे धक्के जाणवले. ढाका, चितगावसह बांगलादेशातील अनेक भागांना 7.3 रिश्टर स्केल तीव्रतेचे भूकंपाचे धक्के बसले. बारा मिनिटांनंतर, म्यानमारमध्ये 6.4 तीव्रतेचा आणखी एक भूकंपाचा धक्का बसला.
