सहाय्यक पोलीस निरीक्षक अश्विनी बिंद्रे हत्याकांड प्रकरण : बडतर्फ वरिष्ठ पोलिस निरीक्षक अभय कुरुंदकर दोषी

असे आहे प्रकरण
सहाय्यक पोलिस निरीक्षक अश्विनी बिद्रे 11 एप्रिल 2016 रोजी बेपत्ता झाल्या होत्या. तत्पूर्वी त्यांनी वरिष्ठ पोलिस निरीक्षक अभय कुरुंदकरची पोलिस ठाण्यात भेट घेतली होती. या भेटीतच कुरुंदकरने स्वतःच्या कारमध्ये अश्विनी यांचा गळा दाबून खून केला. यावेळी महेश फळणीकर हजर असल्याचे समोर आले आहे. या घटनेनंतर कुरुंदकरने लाकूड कापायच्या कटरने अश्विनी यांच्या शरीराचे तुकडे केले. फळणीकर, राजू पाटील आणि खासगी चालकाच्या मदतीने कारमधून हे तुकडे वसईच्या खाडीत फेकले.

खोट्या मेसेजने आरोपी गोत्यात
मोबाइल चॅटिंगमधील एका अक्षरावरून कुरुंदकर हाच अश्विनीचा मारेकरी असल्याचे समोर आले होते. कुरुंदकरने अश्विनी यांची हत्या केली. त्यानंतर त्या जिवंत आहेत, हे भासवण्यासाठी अश्विनींच्या मोबाइलवरून मेहुणे अविनाश गंगापूरे यांना मानसिक अस्वास्थ्यामुळे आपण उपचार घेण्यासाठी 5 ते 6 महिने उत्तरांचल किंवा हिमाचलला जाणार आहोत,’ असा व्हॉट्सअप मॅसेज केला होता. या खोट्या मेसेजनेच तो गोत्यात आला. कारण या संवादात ’हाऊ आर यू’ हा प्रश्न विचारताना कुरुंदकरने ‘यू’ लिहिताना ‘वाय’ हे अक्षर वापरले. मात्र अश्विनी कधीही ‘यू’ लिहिताना वाय वापरत नसत त्या नेहमी यू वापरत. हाच धागा पकडून गुन्हे शाखेने कुरुंदकरच्या मुसक्या आवळल्या होत्या.