आता रेल्वे प्रवासातही काढता येईल एटीएमद्वारे रक्कम
देशातील पहिला प्रयोग मध्य रेल्वेत : पंचवटी एक्सप्रेसमध्ये बसवले एटीएम
गणेश वाघ
Now you can withdraw money from ATMs even during train journey भुसावळ (15 एप्रिल 2025) : रेल्वे प्रवासात आता प्रवाशांना एटीएम सुविधा उपलब्ध करून देण्यात आली आहे. देशातील पहिला प्रयोग मध्य रेल्वेच्या भुसावळ विभागाने राबवला असून पंचवटी एक्स्प्रेसमध्ये ही सुविधा उपलब्ध करून देण्यात आली आहे. एटीएम बसवल्यानंतर मंगळवार, 15 रोजी एक्स्प्रेसने आपला मुंबईपर्यंतचा नियोजित प्रवास पूर्ण केला. अनेकदा प्रवासात निघताना पैसे काढणे शक्य होत नाही अथवा एटीएमवरील रांगेमुळे प्रवासी वैतागतात त्यामुळे आता रेल्वेतच ही सुविधा उपलब्ध करून देण्यात आल्याने प्रवासी सुखावले आहेत.
पंचवटी एक्स्प्रेसमध्ये पहिले एटीएम
मध्य रेल्वेच्या भुसावळ विभागाने प्रवाशांच्या सोयीसाठी आणि नाविन्यपूर्ण उपक्रम राबवला आहे. भुसावळ विभागाने महाराष्ट्र बँकेच्या समन्वयाने धावत्या गाडीत देशातील पहिली ऑनबोर्ड एटीएम सेवा सुरू केली आहे. ग्राहक संवाद बैठकीत हा मुद्दा चर्चेत आल्यानंतर या कल्पनेला प्रतिसाद देत प्रमुख राष्ट्रीयीकृत बँक असलेल्या बँक ऑफ महाराष्ट्रने नवीन, नाविन्यपूर्ण गैर-भाडे महसूल कल्पना अंतर्गत औपचारिक प्रस्ताव सादर केला. सध्या गाडी क्रमांक 12110 मनमाड-मुंबई सीएसएमटी पंचवटी एक्सप्रेसमध्ये एटीएम सेवा सुरू करण्यात आली आहे. ही गाडी दररोज मनमाड ते मुंबई सीएसएमटीदरम्यान धावते. एकूण 22 डब्यांच्या या गाडीची आसन क्षमता दोन हजार 32 तर दररोज सुमारे दोन हजार 200 प्रवासी मुंबई सीएसएमटीकडे प्रवास करतात.
प्रवाशांना सहज घेता येणार लाभ
संपूर्ण गाडी वेस्टिब्यूल कनेक्टेड असल्यामुळे सर्व श्रेणीतील प्रवाशांना या एटीएमचा सहज लाभ घेता येणार आहे. या सेवेसाठी प्रवाशांच्या आसनव्यवस्थेवर किंवा सुविधांवर कोणताही परिणाम होणार नाही, कारण एटीएम कोचमधील पूर्वी न वापरलेल्या जागेत बसवण्यात आले आहे.
प्रवाशांसह ज्येष्ठांची होणार सोय
आता रेल्वे प्रवासातच प्रवाशांना प्रवासादरम्यान सहज आर्थिक व्यवहार करता येणार आहेत. ज्येष्ठ नागरिक, महिला आणि आकस्मिक गरज असलेल्या प्रवाशांसाठी ही सुविधा अत्यंत उपयुक्त ठरेल. ही एटीएम सेवा मोबाईल नेटवर्कद्वारे सतत जोडण्यात आल्याने गाडी प्रवासात असतानाही एटीएमचे व्यवहार सुरूच राहतील.
