सोन्याला लाखाचा भाव न्युज डेस्क । नवी दिल्ली (22 एप्रिल 2025) : लग्न सराईच्या हंगामात सोन्याने लाखाचा पल्ला गाठला आहे. इंडिया बुलियन अँड ज्वेलर्स असोसिएशन नुसार, 24 कॅरेट सोन्याच्या 10 ग्रॅमच्या किमतीत 3,330 रुपयांची वाढ होऊन ती एक लाख रुपयांवर पोहोचली आहे. पूर्वी 10 ग्रॅम सोन्याची किंमत 96,670 होती.
त्याच वेळी, आज एक किलो चांदीची किंमत 342 ने घसरून 95,900 प्रति किलो झाली आहे. पूर्वी चांदीची किंमत प्रति किलो 96,242 होती. 28 मार्च रोजी चांदीने 1,00,934 रुपयांचा उच्चांक गाठला होता.
भाववाढीची ही आहेत कारणे
अमेरिकेच्या टेरिफ धोरणामुळे व्यापार युद्धाचा धोका वाढला आहे. यामुळे अर्थव्यवस्थेचा विकास दर मंदावू शकतो. जागतिक मंदीची भीतीही वाढली आहे. अशा परिस्थितीत लोक सोन्यात गुंतवणूक वाढवत आहेत. मंदीच्या काळात सोन्याला सुरक्षित गुंतवणूक मानले जाते.
डॉलरच्या तुलनेत रुपया कमकुवत झाल्यामुळे सोन्याच्या किमती वाढल्या आहेत. कारण जेव्हा रुपया कमकुवत होतो तेव्हा तो आयात करण्यासाठी जास्त पैसे लागतात. या वर्षी रुपयाचे मूल्य जवळपास 4% घसरले आहे, ज्यामुळे सोन्याच्या किमतींवर दबाव आला आहे.
लग्नसराईचा हंगाम सुरू झाला आहे, त्यामुळे सोन्याच्या दागिन्यांची मागणी वाढत आहे. मुंबई, दिल्ली आणि चेन्नईसारख्या शहरांमधील ज्वेलर्सनी सांगितले की, लोक सोन्याला गुंतवणूक आणि समृद्धीचे प्रतीक मानत असल्याने, उच्च किमती असूनही विक्री तेजीत होती.
