पहेलगाममध्ये धर्म विचारून 26 पर्यटकांची हत्या : महाराष्ट्रातील सहा पर्यटकांची ओळख पटली
26 tourists killed in Pahelgam after asking about religion: Six tourists from Maharashtra identified पहेलगाम (23 एप्रिल 2025) : भारताचे नंदनवन असलेल्या जम्मू-काश्मिरच्या पहेलगाममध्ये दहशतवाद्यांनी मंगळवारी दुपारी तीन वाजेच्या सुमारास केलेल्या हल्ल्यात 26 पर्यटकांचा मृत्यू झाला होता. मृतांची ओळख पटवण्यात यश आले असून त्यात महाराष्ट्रातील सहा पर्यटकांचा समावेश आहे.
पोलिसांच्या वेशात आलेल्या दहशतवाद्यांनी 26 जणांची गोळ्या झाडून हत्या केली तर या घटनेत काही जण जखमी झाले आहेत. मोकळा परिसर असलेल्या बैसरन घाटीतच दहशतवाद्यांनी पर्यटकांना घेरलं. दहशतवाद्यांनी सुरूवातीला पर्यटकांना त्यांचा धर्म कोणता आहे हे विचारले व हिंदू असल्याचे कळताच त्यांच्यावर गोळ्या झाडल्याचे प्रत्यक्षदर्शींनी सांगितले.
महाराष्ट्रातील सहा पर्यटकांचा मृत्यू
पहलगाम दहशतवादी हल्ल्यात महाराष्ट्रातील सहा नागरिकांचा मृत्यू झाला आहे. यात पुण्यातील संतोष जगदाळे आणि कौस्तुभ गणबोटे, तर रायगडमधील दिलीप देसले, ठाणे जिल्ह्यातील अतुल मोने, हेमंत जोशी आणि संजय लेले यांचा समावेश आहे.
अतिरेक्यांनी केलेल्या गोळीबारात मुंबईतील सोबेडे पाटील हे जखमी झाले आहेत. त्यांच्या मानेवर गोळी झाडण्यात आली आहे. तर पनवेल येथील माणिक पटेल हे किरकोळ जखमी झाले आहेत. एस. भालचंद्र, हर्षा जैन आणि निकिता जैन यांचा जखमींमध्ये समावेश आहे. त्या सर्वांची प्रकृती स्थिर असल्याचे प्रशासनाने सांगितले.
पहलगाममध्ये लष्कराची शोध मोहीम सुरू
पहलगाममधील दहशतवादी हल्ल्यानंतर एनआयएचे पथक श्रीनगरला पोहोचले आहे .फॉरेन्सिक टीम त्यांच्यासोबत आहे. जम्मू पोलिसांनी संपूर्ण परिसराला वेढा घातला असून हेलिकॉप्टरच्या मदतीने दहशतवाद्यांचा मागमूस काढला जात आहे. लष्कराचे जवान हे ड्रोनचा वापर करत शोध घेत आहेत.
