पहलगाम हल्ल्याचा ‘ऑपरेशन सिंदूर’द्वारे बदला : भारताचा पाकिस्तानवर एअर स्ट्राइक
24 क्षेपणास्त्रे डागली, 100 हून जास्त अतिरेकी ठार ; पाक संरक्षण मंत्री म्हणाले ; भारताने हल्ले थांबवले तर आम्हीही काही करणार नाही
Revenge of Pahalgam attack through ‘Operation Sindoor’: India launches air strikes on Pakistan नवी दिल्ली (7 मे 2025) : पहलगाम हल्ल्याच्या 15 दिवसानंतर भारताने ‘ऑपरेशन सिंदूर’ राबवत पाकिस्तानवर एअरस्ट्राईक केला. तब्बल 24 क्षेपणास्त्रे डागण्यात आली असून या हल्ल्यात सुमारे शंभरावर दहशवातवादी ठार झाले तर त्यांचे अड्डेही नेस्तनाबूत करण्यात आले. एकीकडे देशभरात मॉकड्रील होणार असल्याची माहिती समोर आल्यानंतर मध्यरात्रीच गनिमी काव्याद्वारे पाकिस्तानवर एअरस्ट्राईक करण्यात आल्याने या कारवाईचे नागरिकांनी जोरदार समर्थन केले आहे.
मंगळवारी मध्यरात्रीनंतर भारतीय हवाई दलाने पाकिस्तान आणि पीओके म्हणजेच पाकव्याप्त काश्मीरमध्ये हवाई हल्ले केले. या हल्ल्यात 7 शहरांमधील 9 दहशतवादी अड्ड्यांवर हल्ला करण्यात आला आहे. आतापर्यंत मिळालेल्या माहितीनुसार, यामध्ये 100 हून अधिक दहशतवादी मारले गेले आहेत.
हल्ला ‘त्या’ महिलांना समर्पित
पहलगाममध्ये दहशतवाद्यांनी धर्म विचारून 26 पर्यटकांची हत्या केली होती व विशेष म्हणजे केवळ पुरूषांनाच दहशतवाद्यांनी लक्ष केल्याने भारतानेही एअर स्ट्राईक ऑपरेशनला सिंदूर हे नाव दिले व हे नाव त्या महिलांना समर्पित आहे ज्यांचे पती 22 एप्रिल रोजी पहलगाममध्ये दहशतवाद्यांनी मारले होते.
पाकिस्तानच्या इंटर-सर्व्हिसेस पब्लिक रिलेशन्स (खडझठ) चे संचालक लेफ्टनंट जनरल अहमद शरीफ चौधरी यांनी सांगितले की, भारताने 24 क्षेपणास्त्रे डागली आहेत.
भारतीय लष्कराने म्हटले आहे की पाकिस्तानी लष्करी प्रतिष्ठानांना लक्ष्य करण्यात आले नाही. दहशतवाद्यांच्या अड्ड्याला लक्ष्य करण्यात आले आहे. दुसरीकडे, सूत्रांनी एएनआय या वृत्तसंस्थेला सांगितले की, ही एक संयुक्त लष्करी कारवाई होती, ज्यामध्ये भारतीय लष्कर आणि हवाई दलाने एकत्रितपणे अचूक स्ट्राइक शस्त्रे वापरली.
वृत्तसंस्था एएनआयने सूत्रांच्या हवाल्याने सांगितले की, भारतीय लष्कराने पहलगाम दहशतवादी हल्ल्यासाठी जैश-ए-मोहम्मद आणि लष्करच्या अड्ड्यांवर हल्ला करण्याच्या उद्देशाने लक्ष्य निवडले होते.
