Biggest news: Ceasefire declared between India and Pakistan नवी दिल्ली (10 मे 2025) : पहलगाम हल्ल्यानंतर भारताने केलेल्या एअरस्ट्राईकनंतर कुरापतखोर पाकिस्तानकडूनही सातत्याने ड्रोनने हल्ले सुरू होते तर भारताकडून जोरदार लष्करी कारवाई झाल्यानंतर पाकिस्तानात हाहःाकार माजला होता. दोन्ही देशातील तणाव निवळण्यासाठी प्रयत्न सुरू असतानाच दोन्ही देशांनी तात्कळ शस्त्रसंधी करण्यासाठी तयार दर्शवली आहे. याबद्दलची घोषणा अमेरिकेचे अध्यक्ष डोनाल्ड ट्रम्प यांनी केली.
भारत आणि पाकिस्तान यांच्यातील मागील दोन दिवसांपासून चांगलाच चिघळला होता. पाकिस्तानकडून रात्रीच्या वेळी भारतातील लष्करी आणि नागरी ठिकाणांवर हल्ले करण्यात आल्यानंतर भारताकडून प्रत्युत्तर दिले गेले. हा संघर्ष दिवसेंदिवस वाढू लागला होता. दोन्ही देशातील तणाव कमी व्हावा यासाठी प्रयत्न सुरु झाले होते. अखेर अमेरिकेच्या मध्यस्थीने हा संघर्ष थांबल्याचे जाहीर करण्यात आले.
अमेरिकेचे अध्यक्ष डोनाल्ड ट्रम्प म्हणाले, अमेरिकेच्या मध्यस्थीने रात्री उशिरापर्यंत चाललेल्या चर्चेनंतर अखेर मला ही घोषणा करताना आनंद होत आहे की, भारत आणि पाकिस्तान हे दोघेही पूर्णपणे आणि तत्काळ शस्त्रसंधी करण्यास तयार झाले आहेत. सारासार विचार आणि विद्वत्तेचा वापर केल्याबद्दल दोन्ही देशांचे अभिनंदन, अशी घोषणा ट्रम्प यांनी केली.
भारताचे परराष्ट्र सचिव विक्रम मिस्त्री यांनी याबद्दल अधिक माहिती दिली. माध्यमांशी बोलताना ते म्हणाले की, पाकिस्तानचे लष्करी मोहीम महासंचालक (डीजीएमओ) आणि भारताचे लष्करी मोहीम संचालक (डीजीएमओ) यांच्यात शनिवारी दुपारी 3.35 मिनिटांनी चर्चा झाली.
दोन्ही देशांकडून जमिनीवरून, हवेतून आणि समुद्रातून होणार हल्ले भारतीय प्रमाणवेळेनुसार 5 वाजेपासून शनिवारपासून तात्काळ थांबवण्यावर एकमत झाले. याची अमलबजावणी करण्याचे दोन्ही बाजूंना सांगण्यात आले आहे. दोन्ही देशांचे डीजीएमओ यांच्या 12 मे रोजी पुन्हा दुपारी 12 वाजता चर्चा होणार आहे, असे मिस्त्री यांनी सांगितले.
पाकिस्तानचे उप पंतप्रधान आणि परराष्ट्र मंत्री इशाक डार यांनीही याला दुजोरा दिला. पाकिस्तान आणि भारत तात्काळ शस्त्रसंधी करण्यास तयार तयार झाले आहेत. पाकिस्ताने सार्वभौमत्व आणि अखंडतेशी तडजोड न करता प्रदेशात शांतता आणि सुरक्षा राहावी यासाठीच प्रयत्न केले आहेत, असे पाकिस्तानचे परराष्ट्र मंत्री डार यांनी सांगितले.
