सोलापूर (19 मे 2025) : टॉवेल निर्मिती कारखान्याला लागलेल्या भीषण आगीत आठ जणांचा होरपळून मृत्यू झाला. यात कारखानदाराच्या कुटुंबातील चार जणांसह एकाच कुटुंबातील चार कामगारांचा समावेश आहे. शॉर्टसर्किटमुळे आग लागल्याचा प्राथमिक अंदाज आहे.
पहाटे लागलेली आग आटोक्यात आणण्यासाठी अक्कलकोट, पंढरपूर आणि बार्शी नगरपालिकेच्या अग्निशमन विभागाच्या गाड्या मागवण्यात आल्या. आगीचे रौद्ररूप पाहता पोलिसांनी परिसरात नाकाबंंदी केली. मदतीसाठी ‘सीआरपीएफ’चे पथकही आले. त्यांनी बघ्यांची गर्दी पांगवत आग आटोक्यात आणण्याच्या कामात मदत केली.
कारखान्याचे मालक उस्मान हाशम मन्सुरी (87), त्यांचा नातू अनस हनिफ मन्सुरी (24), नात सून शिफा अनस मन्सुरी (24) व अनसचा मुलगा युसूफ मन्सुरी (1 वर्ष) हे चौघे मालकाच्या कुटुंबातील आहेत.
कामगार मेहताब सय्यद बागवान (51), आशाबानो मेहताब बागवान (45), सलमान मेहताब बागवान (26), हिना वसीम शेख (24) हे चार जणदेखील एकाच कुटुंबातील आहेत.
मृतांच्या नातेवाईकांना पाच लाख
मृतांच्या कुटुंबीयांना मुख्यमंत्री सहायता निधीतून 5 लाखांची मदत देण्यात येईल, असे मुख्यमंत्री देवेंद्र फडणवीस यांनी म्हटले आहे. पंतप्रधान मोदी यांनीही प्रत्येकी दोन लाख, तर जखमींना 50 हजार रुपयांची मदत जाहीर केली.
