Big achievement of Mohadi police: Opium stock worth Rs 24 lakh seized धुळे (31 मे 2025) : धुळ्यातील मोहाडी पोलिसांनी मुंबई-आग्रा राष्ट्रीय महामार्गावरील लळिंग गावानजीक पेट्रोलपंपाजवळ एका वाहनातून तब्बल 24 लाखांचा 10 प्लास्टिक गोण्यामधील 181 किलो साठा जप्त केला आहे. चालकाला पकडण्यात आले मात्र त्याचा साथीदार पसार झाला आहे.
गस्तीदरम्यान कारवाई
मोहाडीनगर पोलीस ठाण्याचे हवालदार सचिन वाघ, पोलीस शिपाई चेतन झोळेकर, चालक मंगल पवार यांचे पथक शासकीय वाहनातून (एम.एच.18 बी.आर.5410) गुरुवारी रात्री अकरा ते शुक्रवारी पहाटे पाचदरम्यान रात्रगस्त घालत असताना, पहाटे पाचच्या सुमारास मुंबई- आग्रा राष्ट्रीय महामार्गावर लळिंग गावानजीकच्या इंडियन ऑईल पेट्रोल पंपाजवळ कार (एम.एच.12 डी.वाय.5920) वर संशय आल्यानंतर त्यांनी चालकाला कार थांबवण्याचा इशारा केला मात्र चालकाने कार न थांबविता एमएच-18 ढाब्यापासून यू टर्न घेत धुळ्याच्या दिशेने भरधाव नेण्याचा प्रयत्न केला.
पाठलाग करीत कार अडवली
पोलिसांनी कारचा पाठला करीत इंडियन ऑईल पेट्रोलपंपाजवळील समांतर रस्त्यावर कार थांबविली. कार चालक अंधाराचा फायदा घेत लळिंग गावाकडे पळत असताना त्याला लळिंग घाटात पथकाने पकडल्यानंतर त्याने रमेश भवराराम बिष्णोई (वय 33, रा.हेमनगर, जोलीअली, ता.जि.जोधपूर, राजस्थान) असे नाव सांगत पसार झालेल्याचे नाव महेश साहू (रा. खोखरिया, ता. जि. जोधपूर, राजस्थान) असे असल्याचे सांगितले.
कारमध्ये आढळले 24 लाखांचे अफू
कारच्या तपासणीत तब्बल 24 लाख सात हजार 530 रुपये किंमतीचा 181.306 किलोग्रॅम अफूच्या झाडांच्या फुटलेल्या फळाच्या सुकलेल्या टरफल्यांचा चुरा 10 प्लास्टिक गोण्यांमध्ये मिळून आला. पोलिसांनी रमेश बिष्णोई याला अटक केली. हवालदार सचिन वाघ यांनी दिलेल्या फिर्यादीवरून मोहाडीनगर पोलीस ठाण्यात दोघांविरुद्ध गुन्हा दाखल करण्यात आला.
यांनी केली कारवाई
ही कारवाई जिल्हा पोलीस अधीक्षक श्रीकांत धीवरे, अपर पोलीस अधीक्षक किशोर काळे, धुळे शहर उपविभागीय पोलीस अधिकारी राजकुमार उपासे, मोहाडीनगर पोलीस ठाण्याचे प्रभारी अधिकारी शशिकांत श्रीराम पाटील यांच्या मार्गदर्शनाखाली पोलीस उपनिरीक्षक अशोक पायमोडे, हवालदार पंकज चव्हाण, संदीप कदम, पोलीस शिपाई मुकेश मोरे, प्रकाश जाधव, मनीष सोनगिरे यांनी केली.
