धुळ्यातील पावणेदोन कोटींचे घबाड प्रकरण : माजी आमदारांचा पोलिसांनी नोंदवला जवाब
दुसरा संशयीत राजकुमार मोगले 11 दिवसांनंतर पोलिसांच्या ताब्यात
Second suspect Rajkumar Mogle in police custody after 11 days धुळे (2 जून 2025) : राज्यात गाजत असलेल्या धुळे रेस्ट हाऊसमधील घबाड प्रकरणात पोलिसांनी माजी आमदार अनिल गोटे यांचा जवाब नोंदवल्याची माहिती सूत्रांनी दिली तर या प्रकरणात गुन्हा दाखल झालेला दुसरा संशयीत राजकुमार मोगले यास 11 दिवसानंतर पोलिसांनी शोधून धुळ्यात आणले आहे.
काय आहे नेमके प्रकरण
धुळे जिल्ह्याच्या दौर्‍यावर आलेल्या 11 आमदारांच्या अंदाज समितीला देण्यासाठी सुमारे पाच कोटी रुपये गुलमोहोर विश्रामगृहातील 102 क्रमांकाच्या खोलीत असल्याचा दावा माजी आमदार अनिल गोटे व पदाधिकार्‍यांनी केलला होता. खोलीची झडती घेण्यासाठी वरिष्ठ अधिकार्‍यांनी यावे म्हणून चार तास ठिय्या आंदोलनही करण्यात आले होते. अखेर चार तासांनी वरिष्ठ अधिकारी आल्यानंतर खोलीची झडती घेतल्यानंतर त्यात तब्बल एक कोटी 84 लाख रुपये सापडले होते. या रकमेवर कुणीही दावा केला नसल्याने ही रक्कम कुणाची? असा प्रश्नही निर्माण झाला होता मात्र माजी आमदार गोटे यांनी समितीला देण्यासाठीच ही रक्कम गोळा केल्याचा दावा त्यावेळी केला होता.
तीन संशयीतांविरोधात गुन्हा
पोलिसांनी या प्रकरणी प्राथमिक चौकशी केल्यानंतर आमदार अर्जुन खोतकरांचे स्वीय सहाय्यक किशोर पाटील व राजू मोगरे व अन्य एकाविरोधात कलम 124 महाराष्ट्र पोलिस अधिनियम अंतर्गत गुन्हा धुळे शहर पोलिसात (गुन्हा क्रमांक 264/25) दाखल केला होता.
माजी आमदारांचा जवाब नोंदवला
पोलिसांनी दिलेल्या माहितीनुसार, या प्रकरणात माजी आमदार अनिल गोटे यांचा जवाब नोंदवून घेण्यात आला आहे शिवाय गुन्हा दाखल झालेला दुसरा संशयीत राजकुमार मोगले यास 11 दिवसानंतर शोधण्यात यश आल्यानंतर त्यास धुळ्यात आणण्यात आले असून त्याचीदेखील चौकशी सुरू आहे. गुलमोहर रेस्ट हाऊसमधील सीसीटीव्ही फुटेज यंत्रणेने ताब्यात घेतले असून तब्बल तीन हजार फाईलचा डाटा पोलिसांकडून पाहिला जात आहे.
