फडणवीस सरकारमध्ये गिरीश महाजन सर्वाधिक भ्रष्ट मंत्री : खासदार संजय राऊतांचा आरोप

संजय राऊत बुधवारी सकाळी पत्रकारांशी संवाद साधला. त्यात त्यांनी उपमुख्यमंत्री एकनाथ शिंदे व गिरीश महाजन यांच्यावर टीकेची झोड उठवली. मी म्हणजेच पक्ष असा अहंकार जेव्हा माणसात निर्माण होतो, तेव्हा त्या माणसाच्या अधःपतनाला सुरूवात होते. एकनाथ शिंदे उद्धव ठाकरे यांच्यासोबत नाराज होते. ते आज जिथे आहेत तिथेही फार खूश नाहीत. अशा व्यक्तींच्या आजारावर कोणताही उपाय नसतो, असे ते म्हणाले.

गिरीश महाजन यांच्या कार्यालयात अभिषेक कौल नामक व्यक्ती कोण आहे? हा एक ठेकेदार, बिल्डर आहे. तो गिरीश महाजन यांच्या कार्यालयात बसतो. त्याचा फोन आल्याशिवाय महाजन आपत्ती व्यवस्थापनाची एकही फाईल मंजूर करत नाहीत. हा अभिषेक कौल सर्व व्यवहार करतो. त्याच्याकडे पैसे जमा करावे लागतात. आपत्ती व्यवस्थापन हा विषय सर्वसामान्य माणसांच्या संबंधित खाते आहे. 350 फाईल महाजन यांच्या मंत्रालयात पडून आहेत. या सर्व फाईलचे व्यवहार व्हायचे आहेत. हे सर्व व्यवहार कौल करत आहे. महाजन यांनी त्यासाठीच त्याची नियुक्ती केली आहे.

संजय राऊत म्हणाले, कुंभमेळ्याच्या बैठकीच्या निमित्ताने काल गिरीश महाजन अनेक साधूसंतांच्या पाया पडत होते. पण त्यांनी त्यांच्याऐवजी एकनाथ शिंदे व प्रफुल्ल पटेल यांच्यासारख्या ईडी पीडित साधूसंतांच्या पाया पडले पाहिजे. या सर्वांमुळे त्यांना शिवसेना फुटीचा आनंद घेता आला. अन्यथा त्यांची तपश्चर्या कधीच पूर्ण झाली नसती. गिरीश महाजन हे फडणवीस यांच्या मंत्रिमंडळातील अत्यंत भ्रष्ट मंत्री आहेत. मी पुढील काही सांगत नाही. पण अभिषेक कौल यांच्या मंजुरीशिवाय किंवा त्याने एखाद्या फाईलचा व्यवहार पूर्ण केल्याशिवाय महाजन त्या फाईलवर सही करत नाहीत, ही सर्वसामान्य माणसांचे जीवन व भविष्याचा संबंध येणार्‍या आपत्ती व्यवस्थापन खात्याची परिस्थिती आहे. गिरीश महाजन यांचे दलाल मंत्रालयाबाहेर व्यवहार करून फाईल मंजूर करून घेतात. अशा व्यक्तीने पक्षफोडीच्या गोष्टी कराव्यात यात सगळे आले, असे संजय राऊत म्हणाले.