Seven people died in a stampede during RCB’s victory procession बेंगळुरु (4 जून 2025) : आयपीलमध्ये तब्बल 18 वर्षानंतर रॉयल चॅलेंजर्स संघ विजेता ठरल्यानंतर सेलिब्रेशनसाठी एम.चिन्नास्वामी स्टेडियमबाहेर तुफान गर्दी झाली. गर्दीत चेंगराचेंगरी झाल्याने सात जणांचा मृत्यू झाल्याची धक्कादायक माहिती समोर आली आहे. तर अनेक जण जखमी झाले आहेत.
परिस्थितीचं गांभीर्य लक्षात घेता संघाच्या खेळाडूंची बस थेट हॉटेलवर रवाना करण्यात आली. जखमींना जवळच्या रुग्णालयात दाखल करण्यात आले आहे. अपघातामागे आयोजकांचा निष्काळजीपणा आणि गर्दी नियंत्रणातील त्रृटी असल्याचा संशय आहे. पोलीस प्रशासन संपूर्ण प्रकरणाची चौकशी करत आहे.
आरसीबीच्या विजयाच्या निमित्ताने चिन्नास्वामी स्टेडियमवर खेळाडूंच्या सत्काराचा कार्यक्रम आयोजित करण्यात आला. यावेळी आपल्या खेळाडूंची झलक पाहण्यासाठी स्टेडियमबाहेर तोबा गर्दी झाली होती. यावेळी अनावर झालेली गर्दी सुरक्षा रक्षकांच्या हाताबाहेर गेली. यामुळे पोलिसांना लाठीचार्ज करावा लागला. यामुळे चेंगराचेंगरी सदृश्य परिस्थिती निर्माण होऊन अनेक जण जखमी झाले आणि आत्तापर्यंत समोर आलेल्या माहितीनुसार सात जणांना आपला जीव गमावावा लागला आहे.
विराट कोहली आणि रजत पाटीदारच्या नेतृत्त्वाखालील आरसीबी संघाची विजयी मिरवणूक काढण्याचा इरादा प्रशासनाचा होता. परंतु, संभाव्य गर्दी लक्षात घेता परवानगी नाकारण्यात आली होती. त्यानंतर विजयी परेड न काढता चिन्नास्वामी स्टेडियमवर सत्कार सोहळा करण्याचा निर्णय घेण्यात आला. त्यासाठी चाहत्यांना मोफत प्रवेश दिला जाणार असल्याचं जाहीर केलं गेलं होतं. विजयी परेड नसल्यानं सर्व चाहत्यांनी थेट स्टेडियमबाहेर गर्दी केली. चिन्नास्वामी स्टेडियमची आसन क्षमता 30 ते 32 हजार इतकी आहे. पण स्टेडियमबाहेर लाखोंची गर्दी झाली. यावेळी गर्दीला आवरणं सुरक्षा रक्षकांनाही कठीण होऊन बसलं. गर्दी इतकी होती चक्क स्टेडियमबाहेरील वाहनांवर लोक चढले. वाहनांचंही मोठं नुकसान झालं आहे.
