The government’s goal is to completely eradicate Naxalites from the country: Home Minister Amit Shah छत्तीसगड (22 जून 2025) : देशातून नक्षलवाद्यांचा पूर्णपणे नायनाट करणे, हे सरकारचे ध्येय आहे. या दिशेने केंद्र आणि राज्य सरकार वेगाने काम करीत असल्याचे केंद्रीय गृहमंत्री अमित शाह येथे म्हणाले.
देशातून नक्षलवादाचा खात्मा करण्यासाठी 31 मार्च 2026 पर्यंत चा अल्टीमेटम देण्यात आला असून त्या दिशेने नक्षलग्रस्त भागात तीव्र मोहिमा राबवल्या जात आहेत.
पावसाळ्यातही मोहिम कायम
केंद्रीय गृहमंत्री अमित शहा म्हणाले की, पूर्वी नक्षलवादी पावसाचा फायदा घेऊन जंगलात लपून बसायचे परंतु आता असे होणार नाही. नक्षलवाद्यांना पावसाळ्यातही शांत झोपू दिले जाणार नाही. नक्षलवादाविरुद्धची कारवाई पावसातही सुरुच राहील. ही कारवाई कोणत्याही हवामानावर अवलंबून राहणार नाही.
आमचे सुरक्षा दल पूर्ण ताकदीने काम करत आहेत आणि ही लढाई निर्णायक वळणावर पोहोचली आहे. त्यांनी स्पष्टपणे सांगितले की, नक्षलवाद्यांनी शस्त्रे खाली ठेवावीत. आत्मसमर्पण करण्याची यापेक्षा चांगली संधी मिळणार नाही.
गृहमंत्र्यांनी छत्तीसगड सरकारच्या नवीन नक्षलवादी आत्मसमर्पण धोरणाचे कौतुक केले आणि सांगितले की, हा एक सकारात्मक पुढाकार आहे, ज्यामुळे मुख्य प्रवाहात परतणार्‍यांना चांगले भविष्य आणि सन्माननीय जीवन जगण्याची संधी मिळेल. त्यांनी नक्षलवाद्यांना हिंसाचाराचा मार्ग सोडून देशाच्या विकास प्रवासात भागीदार होण्याचे आवाहन केले.
