संगारेड्डी (1 जुलै 2025) : औषध कारखान्यात झालेल्या स्फोटानंतर तब्बल 34 कामगारांचा मृत्यू ओढवला. तेलंगणाच्या संगारेड्डी जिल्ह्यात ही घटना घडली. कारखान्यातून 31 मृतदेह बाहेर काढण्यात आले तर रुग्णालयात तीन जणांचा मृत्यू झाला. 30 हून अधिक जण जखमी आहेत.
पसुमिल्लाराम औद्योगिक क्षेत्रातील सिगाची इंडस्ट्रीजमध्ये सकाळी 8:15 ते 9:30 च्या दरम्यान हा अपघात झाला. आयजी व्ही सत्यनारायण म्हणाले की, घटनेच्या वेळी कारखान्यात 150 लोक होते, जिथे स्फोट झाला तिथे 90 लोक उपस्थित होते.
त्यांनी सांगितले की, एनडीआरएफ, डीआरएफ, एसडीआरएफच्या पथकांसह अग्निशमन दलाच्या 10 गाड्या उपस्थित आहेत. स्फोटाची कारणे तपासली जात आहेत. भट्टीमध्ये जलद रासायनिक अभिक्रियेमुळे स्फोट झाल्याची शक्यता व्यक्त करण्यात आली आहे.
पंतप्रधान मोदींनी एक्स पोस्टद्वारे स्फोटाच्या घटनेवर शोक व्यक्त केला. त्यांनी पंतप्रधान राष्ट्रीय मदत निधीतून मृतांच्या कुटुंबियांना दोन लाख आणि जखमींना 50 हजारांची मदत जाहीर केली.
एका कामगाराने सांगितले की, मी सकाळी 7 वाजता रात्रीची शिफ्ट पूर्ण करून बाहेर आलो. सकाळच्या शिफ्टचे कर्मचारी आधीच आत आले होते. सकाळी 8 च्या सुमारास स्फोट झाला. शिफ्ट दरम्यान मोबाईल जमा होतात, त्यामुळे आत काम करणार्‍या लोकांबद्दल कोणतीही बातमी मिळू शकली नाही.
एका कामगाराच्या नातेवाईक महिलेने सांगितले की तिच्या कुटुंबातील चार सदस्य कारखान्यात काम करतात. यामध्ये तिचा मुलगा, जावई, मोठा दीर आणि छोटा दीर यांचा समावेश आहे. त्यापैकी तिघे सकाळच्या शिफ्टमध्ये होते.
प्रत्यक्षदर्शींच्या मते, स्फोट इतका जोरदार होता की तिथे काम करणारे कामगार सुमारे 100 मीटर अंतरावर पडले. स्फोटामुळे रिअ‍ॅक्टर युनिट उद्ध्वस्त झाले आहे.
