18 civilians die in Gujarat bridge accident: Four engineers suspended सुरत (10 जुलै 2025) : गुजरातमधील वडोदरा येथे बुधवारी भीषण पूल दुर्घटनेत दोन ट्रक, दोन कार आणि एक रिक्षा अशी पाच वाहने नदीत कोसळल्याने आतापर्यंत 18 जणांचा मृत्यू झाल्याची माहिती समोर आली. पूल कोसळल्याप्रकरणी मुख्यमंत्री भूपेंद्र पटेल यांनी राज्याच्या रस्ते आणि इमारत विभागाच्या चार अभियंत्यांना निलंबित केले आहे.
काय घडले गुजरातमध्ये ?
गुजरातमधील वडोदरा आणि आणंदला जोडणारा पूल कोसळल्यानंतर महिसागर नदीतून 18 मृतदेह बाहेर काढण्यात आले आहेत. एनडीआरएफला गुरुवारी सकाळी 2 मृतदेह, दुपारी एक आणि संध्याकाळी एक मृतदेह सापडला, तर बुधवारी 13 मृतदेह सापडले होते. या अपघातात एकाच कुटुंबातील तीन जणांचा मृत्यू झाला आहे. तर 2 जण अजूनही बेपत्ता आहेत.
गुजरातमधील वडोदरा येथे झालेल्या पूल दुर्घटनेनंतर राज्य सरकारने या प्रकरणी कारवाई केली आणि अपघातासाठी जबाबदार असलेल्या गुजरात रस्ते आणि इमारत विभागाच्या चार अभियंत्यांना तत्काळ निलंबित केले. प्राथमिक चौकशीच्या आधारे राज्य सरकारने ही कारवाई केली. या दरम्यान, सरकारने एनएम नाईकवाला (कार्यकारी अभियंता), यूसी पटेल (उप-कार्यकारी अभियंता), आरटी पटेल (उप-कार्यकारी अभियंता) आणि जेव्ही शाह (सहाय्यक अभियंता) यांना निलंबित केले.
या अपघातानंतर मुख्यमंत्री भूपेंद्र पटेल यांनी वडोदरा आणि आणंदला जोडणार्‍या या पुलावरील अपघाताची सखोल उच्चस्तरीय चौकशी करण्याचे निर्देश दिले. मुख्यमंत्र्यांनी अपघातग्रस्त मुजपूर-गंभीरा पुलाची आतापर्यंत केलेली दुरुस्ती, तपासणी आणि गुणवत्ता तपासणी यासारख्या मुद्द्यांवर तज्ज्ञांच्या पथकाला अहवाल तयार करण्याची जबाबदारीही दिली होती. त्यानंतर तज्ज्ञांच्या पथकाने अपघातस्थळाला भेट दिली आणि अपघाताच्या कारणांचा प्राथमिक तपास अहवाल सरकारला सादर केला. याआधारे, राज्य सरकारने या चार अधिकार्‍यांना निलंबित केले.
