19-year-old girl raped आळंदी (13 जुलै 2025) : 19 वर्षीय युवतीवर बलात्कार झाल्याचा प्रकार समोर आल्याने खळबळ उडाली आहे. पीडित युवतीने पाच जणांविरुद्ध जबरदस्तीने अपहरण करून बलात्कार केल्याची गंभीर तक्रार शेवगाव पोलिसात दाखल केली.
अ‍ॅसीड टाकण्याची धमकी
पीडित युवतीच्या तक्रारीनुसार, 2 जून 2025 रोजी सायंकाळी ती घरी एकटी असताना, तिच्या ओळखीच्या जनाबाई आंधळे या तिला शेतात चल असे म्हणत बाहेर घेऊन गेल्या. वाटेत एका काळ्या रंगाच्या इर्टिगा गाडीतून (एम.एच.43 सी.सी.7812) आण्णासाहेब आंधळे, प्रवीण आंधळे आणि एक अनोळखी चालकाने जबरदस्तीने तिला गाडीत बसवले त्यावेळी आरडा-ओरडा केल्यावर अ‍ॅसिड टाकण्याची धमकी आरोपींनी दिली. त्यानंतर तिला तीर्थक्षेत्र आळंदी येथे नेण्यात आले.
आळंदीत आण्णासाहेब आंधळे, प्रवीण आंधळे, कीर्तनकार सुनीता आंधळे आणि अभिमन्यु आंधळे यांनी तिला एका खोलीत डांबून ठेवले. फिर्यादीनुसार, आण्णासाहेब आंधळे याने तिच्यावर जबरदस्तीने बलात्कार केला. या घटनेनंतर पीडितेने एका मोबाईल फोनद्वारे 112 वर संपर्क साधून मदत मागितली.
आळंदी पोलिस तत्काळ घटनास्थळी दाखल झाले आणि संबंधित व्यक्तींना पोलीस ठाण्यात आणण्यात आले. सुरुवातीला घाबरल्यामुळे पीडित युवतीने तक्रार दिली नव्हती, परंतु घरच्यांना सर्व हकीकत सांगितल्यावर 7 जुलै रोजी शेवगाव पोलीस ठाण्यात अधिकृत तक्रार दाखल करण्यात आली.
