धुळ्यात 22 हजारांच्या बनावट नोटांसह बुलढाण्यातील संशयीताला पकडले
धुळे तालुका पोलिसांची कामगिरी : बनावट नोटा चलनात आणल्याचा संशय
Suspect from Buldhana caught with fake notes of Rs 22,000 in Dhule धुळे (1 नोव्हेंबर 2025) : धुळे तालुका हद्दीतील चांदे फाट्याजवळ एका संशयीताकडे बनावट नोटा असल्याची माहिती धुळे तालुका पोलिसांना मिळाल्यानंतर पथकाने धाव घेत संशयीताला ताब्यात घेतल्यानंतर झडतीदरम्यान त्याच्याकडून 22 हजारांच्या बनावट नोटा जप्त करण्यात आल्या. ही कारवाई शुक्रवार, 31 रोजी राष्ट्रीय महामार्ग क्रमांक 211 वरील चांदे फाटा येथे करण्यात आली. मोहम्मद जफर मोहम्मद कुद्दुस (30, रा.टिपु सुलतान चौक, इकबाल नगर, बुलढाणा) असे अटकेतील आरोपीचे नाव आहे.
गोपनीय माहितीवरून कारवाई
धुळे तालुका पोलिस निरीक्षक धनंजय पाटील यांना बनावट नोटा बाळगणार्या संशयीताची माहिती मिळताच त्यांनी पथकाला निर्देश दिले. पथकाने चांदे फाटाजवळील सुर्यपुत्र हॉटेल येथे संशयीतावर कारवाई केली व अंगझडतीत 500 रुपये दराच्या 44 नोटा तसेच शंभर रुपये दराच्या दोन बनावट नोटा मिळून 22 हजार 200 रुपयांचे बनावट चलन जप्त केले. आरोपीविरोधात धुळे तालुका पोलिसात गुन्हा दाखल करण्यात आला असून त्यास अटक करण्यात आली.
यांनी केली कारवाई
ही कारवाई पोलिस अधीक्षक श्रीकांत धीवरे, अपर पोलिस अधीक्षक अजय देवरे, धुळे तालुका पोलिस निरीक्षक धनंजय पाटील यांच्या मार्गदर्शनाखाली पोलिस उपनिरीक्षक कृष्णा पाटील, हवालदार उमेश पवार, हवालदार ललित खळगे, हवालदार मनोज शिरसाठ, कॉन्स्टेबल कुणाल शिंगाणे, कॉन्स्टेबल प्रतीक देसले, कॉन्स्टेबल राहुल देवरे, कॉन्स्टेबल गजेंद्र मुंढे, कॉन्स्टेबल राजु पावरा, कॉन्स्टेबल जयेश बाविस्कर, दीपक मोहिते, कॉन्स्टेबल संदीप गुरव आदींच्या पथकाने केली.
