Beware of fake parcel calls: Police Inspector Samadhan Wagh धुळे (1 नोव्हेंबर 2025) : डिजिटल युगात फसवणुकीची नवीन पद्धत्त समोर आली आहे. ज्यामध्ये फसवणूक करणारे कस्टम अधिकारी वा पोलिस अधिकारी असल्याचे भासवून लाखो रुपयांना फसवत आहेत. कुरिअर घोटाळा नावाच्या या नवीन पद्धतीमध्ये, पोलिस अधिकारी किंवा एनसीआरबी एजंट म्हणून भासणारे लोक ड्रग्ज किंवा इतर बंदी घातलेले पदार्थ असलेले पार्सल पाठवण्या आणि प्राप्त करण्याशी संबंधित बेकायदेशीर क्रियाकलापांमध्ये गुंतल्याचा आरोप करून लोकांशी फसवणूक करीत असल्याने अशा लोकांपासून व फसव्या कॉलपासून सावध राहण्याचे आवाहन देवपूर पोलिस निरीक्षक समाधान वाघ यांनी केले आहे.
फसव्या कॉलपासून रहा सावध
अलीकडे पार्सल स्कॅम प्रकारचे सायबर फसवणुकीचे प्रकार वाढले आहेत. फसवणूक करणारे स्वतःला कस्टम अधिकारी, कुरिअर एजंट किंवा पोलिस अधिकारी म्हणून ओळखवतात आणि सांगतात –
तुमचं पार्सल संशयास्पद आहे, त्यात ड्रग्ज आढळले आहेत किंवा तुमच्यावर कारवाई होईल, अशी भीती घालून कॉलद्वारे ते घाबरवून आधार क्रमांक, बँक डिटेल्स किंवा ओटीपी मागतात किंवा व्हिडिओ कॉलवर कागदपत्र दाखवण्यास सांगतात. एकदा माहिती मिळाल्यानंतर ते तुमच्या खात्यातील पैसे लंपास करतात, असे निरीक्षक वाघ म्हणाले.
सावध रहा आणि सुरक्षित रहा
अशा कोणत्याही कॉलवर विश्वास ठेऊ नका तसेच आपला आधार क्रमांक, ओटीपी, बँक माहिती कोणालाही देऊ नका शिवाय कुरिअर कंपनी किंवा कस्टम विभाग कधीही अशा माहितीची मागणी करत नाही. संशयास्पद कॉल आल्यास त्वरित पोलिस ठाणे किंवा सायबर हेल्पलाईनशी संपर्क साधा, असे आवाहन पोलिस निरीक्षक समाधान वाघ यांनी केले आहे.
सायबर हेल्पलाईन क्रमांक : 1930
