Youth shot dead in Jalgaon MIDC: Accused couple in police net जळगाव (5 नोव्हेंबर 2025) : जळगाव एमआयडीसी कंपनीतील विजेत्या कर्मचार्‍याचा वादानंतर गोळीबार करून खून करण्यात आला होता. खुनानंतर पसार झालेल्या आरोपी दाम्पत्याला पोलिसांनी अटक केली आहे. राहुल रामचंद्र बर्‍हाटे (35) व पत्नी मोनाली राहुल बर्‍हाटे (30, दोघे रा.रामेश्वर कॉलनी, जळगाव) अशी अटकेतील आरोपी दाम्पत्याची नावे आहेत. आरोपींच्या गोळीबारात राजन शेख रफिउल्ला याचा उपचारादरम्यान मृत्यू झाला होता तर दुसरा कामगार अहमद फिरोज शेख अद्यापही गंभीर आहे.
काय आहे नेमके प्रकरण ?
एमआयडीसीतील जी-14 सेक्टरमध्ये काम करणारे उत्तरप्रदेशातील फिरोज शेख, राजन शेख व इतर काही मजूर हे विजेते कंपनीत कार्यरत आहेत. कंपनीपासून काही अंतरावर आरोपी राहुल बर्‍हाटे याची पानपटरी असून तो तेथे बेकायदेशीररीत्या दारू विक्री करतो. रविवारी रात्री दहाच्या सुमारास सरफू अहमद हा पुडी घेण्यासाठी गेला असता, राहुलने त्याला मारहाण केली. हा प्रकार थांबवण्यासाठी कंपनीतील काही कामगार तेथे गेले असता, त्याची पत्नी मोनाली स्कुटरवर तेथे पोहोचली. तिने राहुलच्या हातात गावठी पिस्तुल दिले आणि त्यानंतर राहुलने कामगारांवर गोळीबार केला.
उपचारादरम्यान कर्मचार्‍याचा मृत्यू
गोळीबारात राजन शेख याला किडनीजवळ गोळी लागून तो गंभीर जखमी झाला. अहमद फिरोज शेख हाही गंभीर जखमी झाला. दोघांना तात्काळ जिल्हा रुग्णालयात दाखल करण्यात आले, मात्र सोमवारी दुपारी राजनचा मृत्यू झाला.
नांदुरा येथून आरोपींना बेड्या
गोळीबारानंतर आरोपी दाम्पत्य दुचाकीवरून नांदूराच्या दिशेने पसार झाले मात्र एमआयडीसी पोलिस ठाण्याचे निरीक्षक बबन आव्हाड यांच्या मार्गदर्शनाखालील गुन्हे शोध पथकाने तातडीने पाठलाग सुरू केला. पोलिस उपनिरीक्षक राहुल तायडे यांच्या नेतृत्वाखालील पथकाला आरोपींचा ठावठिकाणा मिळाल्यानंतर नांदूरा चौफुलीजवळ सापळा रचण्यात आला आणि दोघांना अटक करण्यात आली. आरोपींना न्यायालयाने 10 नोव्हेंबरपर्यंत पोलिस कोठडी सुनावली. आरोपी राहुल बर्‍हाटे याच्याविरुद्ध आधीच आठ ते दहा गंभीर गुन्ह्यांची नोंद असून, त्याच्यावर एमपीडीए अंतर्गत कारवाई झाल्याचे पोलिसांनी सांगितले.
यांनी केली कारवाई
ही कारवाई गुन्हे शोध पथकातील उपनिरीक्षक चंद्रकांत धनके, एएसआय विजयसिंग पाटील, प्रदीप चौधरी, किरण चौधरी, गणेश ठाकरे, नितीन ठाकूर, शशिकांत मराठे, किरण पाटील आणि गिरीष पाटील आदींनी केली.
