जळगावात तीन ठिकाणी हातचलाखीने सोन्याचे दागिने लांबवले : चोरटी महिला कॅमेर्‍यात कैद
Gold ornaments stolen at three places in Jalgaon : Female thief caught on camera जळगाव (7 नोव्हेंबर 2025) : शहरातील तीन नामांकित दागिन्यांच्या दुकानांमध्ये दागिणे घेण्याच्या बहाण्याने लेडी स्नॅचरने चोरी केल्याने सराफा व्यापारी वर्तुळात प्रचंड खळबळ उडाली. तब्बल साडेचार लाख रुपयांचे सोन्याचे दागिने लंपास करण्यात आले असून पोलिसांनी आरोपी महिलेसाठी विशेष पथक तयार करून शोधमोहीम सुरू केली आहे.
काय घडले जळगावात ?
27 ऑक्टोबर रोजी सायंकाळी पाचच्या सुमारास सुभाष चौकातील आर.सी. बाफना ज्वेलर्समध्ये हिरव्या रंगाचा पंजाबी ड्रेस परिधान केलेली एक महिला अंगठ्या पाहण्याच्या बहाण्याने आली. अंगठ्या दाखविताना तिने सेल्समनचे लक्ष विचलीत करून एक लाख 85 हजार रुपयांच्या दोन सोन्याच्या अंगठ्या चोरल्या आणि त्याऐवजी नकली अंगठ्या ट्रेमध्ये ठेवल्या. हा प्रकार सीसीटीव्हीत स्पष्टपणे कैद झाला.
यानंतर अवघ्या अर्ध्या तासात तीच महिला भंगाळे गोल्ड ज्वेलर्समध्ये गेली आणि त्याच युक्तीने एक लाख 45 हजार रुपयांची अंगठी लंपास केली. जिल्हापेठ पोलिस ठाण्याच्या हद्दीत सायंकाळी सहा ते सात या वेळेत तिने आणखी एका सुवर्णपेढीत एक लाख 40 हजार रुपये किमतीची अंगठी हातचलाखीने चोरून नेली.
तिन्ही ठिकाणांहून मिळालेल्या सीसीटीव्ही फुटेजमध्ये एकाच महिलेचा सहभाग स्पष्ट दिसत असून, तिच्या हालचालींचे ठसे व चेहर्‍याचे स्पष्ट दृश्य पोलिसांनी हाती घेतले. आरोपी महिलेच्या शोधासाठी शनिपेठ पोलिस ठाण्यातील हवालदार प्रदीप नन्नवरे यांच्या नेतृत्वाखाली तपास सुरू आहे.
