Stone-throwing after an argument between two groups over cricket in Jalgaon’s Tambapur : Three injured? जळगाव (9 नोव्हेंबर 2025) : क्रिकेट खेळण्याच्या वादातून जळगावच्या तांबापुरा भागात दोन गटात वाद झाल्यानंतर तुफान दगडफेक करण्यात आली. यात तीन जण जखमी झाल्याची प्राथमिक माहिती आहे. पोलिस प्रशासनाने धाव घेत शांतता निर्माण केली असून बंदोबस्त तैनात करीत संशयीतांचा कसून शोध सुरू करण्यात आला आहे.
काय घडले जळगावात?
क्रिकेट खेळणारे हे तरुण तांबापुरा परिसरातील गवळी वाडा आणि बिलाल चौक येथील असल्याचे पोलिसांकडून सांगण्यात आले. अचानक उसळलेल्या या गोंधळामुळे परिसरात काही काळ तणाव निर्माण झाला होता. जखमींना तात्काळ जळगाव शासकीय वैद्यकीय महाविद्यालयात उपचारासाठी हलविण्यात आले असून त्यांच्यावर वैद्यकीय उपचार सुरू आहेत.
यंत्रणेची घटनास्थळी धाव
जळगावचे पोलिस उपअधीक्षक नितीन गणापुरे, स्थानिक गुन्हे शाखेचे पोलिस निरीक्षक राहुल गायकवाड, एमआयडीसी पोलिस स्टेशनचे निरीक्षक बबन आव्हाड, सहाय्यक निरीक्षक अनिल वाघ, गणेश वाघ, पीएसआय चंद्रकांत धनके आणि अशोक काळे यांच्यासह दंगा नियंत्रण पथकाचा मोठा फौजफाटा घटनास्थळी दाखल झाला. पोलिसांनी तत्काळ परिस्थितीवर नियंत्रण मिळवून परिसरात शांतता प्रस्थापीत केली.
