A speeding car crashed into a divider near Wakod after an accident : Woman dies after catching fire जामनेर (10 नोव्हेंबर 2025) : भरधाव वेगाने कारचा टायर फुटल्यामुळे ती दुभाजकावर आदळली व त्यानंतर आग लागल्याने त्या होरपळून विवाहितेचा मृत्यू झाला तर पती जखमी झाला. जळगाव-छत्रपती संभाजीनगर महामार्गावर सोमवारी दुपारच्या सुमारास हा अपघात घडला.
जान्हवी संग्राम मोरे (21) असे मृत विवाहितेचे तर पती संग्राम जालमसिंग मोरे (23, रा.कुलमखेडा, जि.बुलढाणा) हा गंभीररित्या भाजला आहे. जान्हवी ही पतीसोबत माहेरी बोहर्डी (ता.भुसावळ) येथे आली होती.
तिथून ते कारने छत्रपती संभाजीनगरकडे जात होते. वाकोदनजीक त्यांची कार दुभाजकावर धडकली आणि कारला आग लागली. जान्हवी ही सहा महिन्याची गर्भवती होती, अशी माहिती मिळाली आहे. या घटनेनंतर कुटुंबीयांवर दुःखाचा डोंगर कोसळला.
अपघातानंतर चालकाला गाडीमधून बाहेर काढण्यात यश आले मात्र कारच्या मागील बाजूस बसलेली महिला गंभीररीत्या अडकली होती. पेट वाढत असल्याने दरवाजा किंवा काच फोडणे शक्य होत नव्हते. सूत्रांच्या माहितीनुसार, आगीचे प्रमाण काही मिनिटांतच वाढत गेले आणि मदतकार्य सुरू असतानाच महिलेला बाहेर काढण्याची संधी मिळाली नाही.
अपघाताची माहिती मिळताच जामनेर पोलिसांची टीम घटनास्थळी दाखल झाली. आगीवर नियंत्रण मिळवण्यासाठी स्थानिकांनी पाण्याचा वापर केला परंतु आग इतकी प्रचंड होती की कार पूर्णपणे जळून खाक झाली. मृत महिलेची ओळख पटविण्याचे काम सुरू असून पोलिसांनी मृतदेह शवविच्छेदनासाठी पाठवला आहे. चालकाच्या जखमांवर स्थानिक रुग्णालयात उपचार सुरू आहेत.
