मालेगाव तालुका हादरला : चिमुकलीची अत्याचारानंतर दगडाने ठेचून हत्या
संतप्त गावकर्‍यांचा मालेगाव-कुसुंबा मार्गावर रास्ता रोको : आरोपीला फाशीची देण्याची मागणी
Malegaon taluka shaken: Child beaten to death with a stone after being tortured मालेगाव (17 नोव्हेंबर 2025) : चॉकलेट देण्याच्या बहाण्याने साडेतीन वर्षीय अल्पवयीन मुलीचे अपहरण करीत तिच्यावर अत्याचार करण्यात आला व नंतर तिची दगडाने ठेचून हत्या करण्यात आल्याचा संतापजनक प्रकार मालेगाव तालुक्यात घडल्याने राज्यात खळबळ उडाली आहे. या प्रकारानंतर संतप्त ग्रामस्थांनी मालेगाव-कुसुंबा मार्गावर रास्ता रोको करीत आरोपीला फाशीची देण्याची मागणी केली. पोलिसांनी घटनेची गांभीर्याने दखल घेत आरोपी विजय संजय खैरनार (24) यास अटक केली आहे.
काय आहे नेमके प्रकरण
मालेगाव तालुक्यातील एका गावातील चिमुकल्याच्या पालकांचे आरोपीशी महिना भरापूर्वी भांडण झाले व त्या रागातून आरोपीने हे अल्पवयीनाची हत्या केल्याची माहिती आहे. रविवारी दुपारनंतर खेळण्यासाठी घराबाहेर पडलेली चिमुकली बराच वेळ झाल्यानंतरही घरी न आल्याने शोध सुरू करण्यात आलाव तक्रार दाखल करण्यात आली. गावकर्‍यांना गावाच्या खेटून असलेल्या मोबाईल टॉवरजवळ तिचा मृतदेह आढळून आला. छिन्नविछिन्न अवस्थेतील चेहरा बघितल्यावर चिमुकलीची हत्या झाल्याचे प्रथमदर्शनीच गावकर्‍यांच्या लक्षात आले.
आरोपीला पोलिसांकडून अटक
घटनेचे गांभीर्य लक्षात घेता पोलिसांनी तातडीने तपासाचे चक्रे फिरवले. मालेगाव तालुक्यातील एका गावातील विजय संजय खैरनार (24) यास ताब्यात घेतल्यानंतर खाक्या दाखवताच त्याने गुन्ह्याची कबुली दिली. या प्रकरणी मालेगाव तालुका पोलिसात गुन्हा दाखल करण्यात आला.
न्यायालयाने आरोपीला 20 नोव्हेंबरपर्यंत पोलिस कोठडी सुनावली.
ग्रामस्थांनी रोखला महामार्ग
चिमुकल्याच्या हत्येच्या निषेधार्थ सोमवारी डोंगराळे येथे संतप्त गावकर्‍यांनी मालेगाव कुसुंबा रस्त्यावर रास्ता रोको आंदोलन केले. हा खटला जलदगती न्यायालयात चालवून नराधमाला लवकरात लवकर फाशीची शिक्षा द्यावी, असा आग्रह गावकर्‍यांनी धरला. शालेय शिक्षण मंत्री दादा भुसे यांनी डोंगराळे येथे भेट देऊन गावकर्‍यांशी चर्चा केली. आरोपीला तातडीने फाशी द्यावी, असा आग्रह त्यांच्याकडे देखील गावकर्‍यांनी धरला. संवेदनशील प्रकरण लक्षात घेता सामान्य रुग्णालय प्रशासनाने या चिमुकलीचा मृतदेह रात्रीच नाशिक येथे विच्छेदनासाठी पाठवून दिला.
अत्याचारानंतर केली हत्या
नाशिकला करण्यात आलेल्या शवविच्छेदन अहवालात चिमुकलीवर अत्याचार झाल्याचे तसेच डोक्यात वर्मी घाव बसल्याने तिचा मृत्यू झाल्याचे नमूद आहे. संशयीत नराधम व मृत चिमुकलीचे पालक यांची घरे शेजारी-शेजारी आहेत. चॉकलेटचा बहाना करून त्याने या चिमुकलीला घरात बोलावून घेतले. त्यानंतर तिच्यावर अत्याचार करून तिची हत्या केल्याचा पोलिसांना संशय आहे.
