Pune Police takes major action in Umarti : 50 illegal arms factories destroyed चोपडा (23 नोव्हेंबर 2025) : शस्त्र तस्करीसाठी बदनाम असलेल्या मध्य प्रदेशातील उमर्टीत पुणे पोलिसांनी वाढत्या शस्त्रांच्या पार्श्वभूमीवर अत्यंत गोपनीय पद्धत्तीने शनिवारी कारवाई करीत 50 कारखान्यांवर कारवाई केली. पुणे पोलिसांनी तीन आठवडे तयारी करून ‘ऑपरेशन उमर्टी’ राबवण्यात आल्याचे सांगण्यात आले.
उमर्टी गावातूनच महाराष्ट्रासह विविध राज्यांत बेकायदा शस्त्रांचा पुरवठा दलालांमार्फत केला जात असल्याची माहिती मिळाल्यानंतर पुणे पोलिसांचे पथक तेथे रवाना झाले. जळगाव, धुळे मार्गे ही शस्त्रे दुचाकी व चारचाकी वाहनांतून महाराष्ट्रात आणली जात असल्याचेही उघड झाले.
छाप्यावेळी संपूर्ण गावाने पुणे पोलिस पथकाला विरोध करण्याचा प्रयत्न केला मात्र शीघ्रकृती दल, अश्रुधूर पथक आणि मध्य प्रदेश एटीएसच्या मदतीने पोलिसांनी कारवाई यशस्वीपणे पार पाडली. या मोहिमेत तब्बल 50 बेकायदा शस्त्रनिर्मिती कारखाने उद्ध्वस्त करण्यात आले तर 36 संशयितांना ताब्यात घेण्यात आले. याशिवाय 21 पिस्तुले, अनेक बॅरल, मँगझीन स्प्रिंग, पाईप्स आणि शस्त्रनिर्मितीची इतर सामग्री जप्त करण्यात आली.
उमर्टी गावाचा अवैध शस्त्रनिर्मितीचा इतिहास दोन ते तीन दशकांपूर्वीचा असून येथे लेथ मशीन, हाताने घासणी आणि पारंपरिक पद्धतीने शस्त्रे तयार केली जातात. मागणीनुसार केवळ 5-6 तासांत शस्त्र तयार करून ते 15 ते 20 हजार रुपयांत ओळखीच्या व्यक्तींना पुरवले जात होते, असे पोलिस तपासात समोर आले आहे. या कारवाईनंतर महाराष्ट्रासह इतर राज्यांत शस्त्र पुरवठ्याचे मोठे जाळे उद्ध्वस्त झाले आहे.
