Nine suspects, including a teacher, arrested for allegedly trying to crack TET papers कोल्हापूर (24 नोव्हेंबर 2025) : शिक्षक पात्रता परीक्षेचा पेपर फोडण्याच्या तयारीत असणार्‍या टोळीचा कोल्हापुरात पर्दाफाश करण्यात आला. मुरगुड पोलिस व स्थानिक गुन्हे अन्वेषणच्या पथकाने शिक्षकांसह 9 जणांना अटक केली.
टोळीची राज्यात व्याप्ती ?
अटकेतील टोळीची व्याप्ती फार मोठी असण्याची शक्यता आहे. मुरगुड पोलिस या घटनेचा गांभीर्याने तपास करत आहेत. राज्यभरामध्ये शिक्षक पात्रता परीक्षेसाठी लाखो परीक्षार्थी शिक्षकांनी परीक्षा दिली. कोल्हापूर जिल्ह्यामध्ये मात्र हा पेपरच फोडण्याचा प्रयत्न झाल्याने काही वेळ गोंधळ उडाला. ताब्यात घेतलेल्या संशयितांमध्ये काही शाळेतील परीक्षार्थी शिक्षकांचाही सहभाग असण्याची शक्यता आहे. सर्व संशयितांना कागल तालुक्यातील सोनगे येथून पोलिसांनी ताब्यात घेण्यात आले. दरम्यान,राज्यात 28939 विद्यार्थी गैरहजर राहिल्याचे मंडळाकडून सांगण्यात आले आहे.
बीड जिल्ह्यात सहा विद्यार्थ्यांनी लिहिली चर्चा करून उत्तरे
राज्यात एकूण चार लाख 75 हजार 669 परीक्षार्थी होते. त्यापैकी पेपर एकसाठीच्या 203334 पैकी 190897 परिक्षार्थींनी परीक्षा दिली, तर 12437 गैरहजर राहिले. पेपर दोनसाठी 272335 पैकी 255833 परीक्षा दिली, तर 16502 गैरहजर राहिले. एकूण गैरहजर परीक्षार्थींचे प्रमाण 6.9 टक्के राहिले, तर 93.94 टक्के विद्यार्थ्यांनी परीक्षा दिली. पेपर 1 साठी 571 तर पेपर 2 साठी 852 केंद्रांवर सीसीटीव्ही कॅमेरे बसवण्यात आलेले होते.
कॅमेर्‍याचे थेट प्रक्षेपण कंट्रोल रूममध्ये होत होते. पुण्यातील कंट्रोल रूममधून सीसीटीव्ही कॅमेर्‍यांच्या माध्यमातून नांदेड जिल्ह्यातील एका केंद्रावर 2 व बीड जिल्ह्यातील एका केंद्रावर 6 विद्यार्थी सातत्याने चर्चा करून प्रश्नांची उत्तरे’ लिहीत असल्याचे दिसून आले.
