जळगाव (26 नोव्हेंबर 2025) : रामानंद नगर पोलिसांनी 30 लाख 20 हजार रुपयांचा गुटखा जप्त केला असून वाहन चालक किरण भास्कर नांदरे (43, रा.सेंट्रल बँक कॉलनी, पिंप्राळा) याला ताब्यात घेत त्याच्याविरोधात गुन्हा दाखल केला.
गोपनीय माहितीवरून कारवाई
पिंप्राळा परिसरातील सेंट्रल बँक कॉलनी येथील एकमुखी दत्त मंदिराजवळ मालवाहू वाहन (एम.एच.19 सी.एक्स. 6634) संशयास्पदरीत्या उभे असल्याची माहिती रामानंद नगर पोलिसांना मिळाली. त्यानुसार पोलिस निरीक्षक राजेंद्र गुंजाळ यांच्या मार्गदर्शनाखाली उपनिरीक्षक सचिन रणशेवरे, कालसिंग बारेला, प्रवीण जगदाळे व विनोद सुर्यवंशी यांनी घटनास्थळी धाव घेतली. वाहनाची तपासणी केली असता त्यात राज्यात प्रतिबंधित असलेला गुटखा, पानमसाला व तंबाखूचे पोते व बॉक्स असा तब्बल 24 लाख 20 हजार रुपयांचा मुद्देमाल आढळून आला.
पोलिसांनी तत्काळ अन्न व औषध प्रशासन विभागाला माहिती दिली. त्यानुसार अन्न सुरक्षा अधिकारी शरद पवार अमोल जगताप, आकाश बोर्हाडे व योगराज सुर्यवंशी यांच्यासह घटनास्थळी दाखल झाले.
मुद्देमाल जप्त केल्यानंतर पोलिसांनी वाहन चालक किरण नांदरेला ताब्यात घेतले. प्रतिबंधित गुटख्याची चोरटी वाहतूक कोणत्या मार्गाने होत होती व पुरवठा कुठे केला जात होता, याबाबत पोलिसांकडून चौकशी सुरू आहे. पोलिसांनी पंचनामा करून वाहनासह सर्व जप्त केलेला मुद्देमाल रामानंद नगर पोलिस ठाण्यात जमा केला आहे.
