भुसावळ आरपीएफचा गुन्हेगारांना ‘ब्रेक’ : प्रवाशांचा 16 कोटींचा मुद्देमाल केला परत

Bhusawal RPF puts a ‘stop’ to criminals : Returned stolen goods worth 16 crore rupees to passengers भुसावळ (6 जानेवारी 2026) : रेल्वे प्रवाशांच्या सुरक्षिततेसाठी कटिबद्ध असलेल्या रेल्वे सुरक्षा दलाने 2025 या वर्षात गुन्हेगारीवर वचक निर्माण करण्यासोबतच ‘खाकी’तील माणुसकीचे दर्शन घडवले आहे. ‘ऑपरेशन अमानत’अंतर्गत प्रवाशांचा चुकून विसरलेला तब्बल 16 कोटी 42 लाख 28 हजार 926 रुपयांचा मुद्देमाल शोधून तो प्रामाणिकपणे मूळ मालकांना परत केला आहे. रेल्वे सुरक्षा दलाने केवळ गुन्हेगारांच्याच मुसक्या आवळल्या नाहीत, तर 16 प्रवाशांना मृत्यूच्या दारातून बाहेर काढत जीवनदान दिले आहे.

सात महिलांना प्रसुतीसाठी मदत
रेल्वे प्रवासादरम्यान महिला प्रवाशांची सुरक्षित प्रसूती करणे असो किंवा चालत्या गाडीत प्रवाशांचे प्राण वाचवणे,आरपीएफच्या जवानांनी प्रत्येक वेळी तत्परता दाखवली.वर्षभरात 7 महिलांना ‘ऑपरेशन मातृशक्ती’ अंतर्गत सुरक्षित प्रसूतीसाठी मदत करण्यात आली तसेच विनाकारण साखळी ओढून रेल्वेचा खोळंबा करणार्‍या एक हजार 840 प्रवाशांवर कठोर दंडात्मक कारवाई करण्यात आली आहे. बनावट तिकीट दलाल आणि चोरांवर ‘सर्जिकल स्ट्राईक’ तिकीट दलालांच्या विळख्यातून प्रवाशांना सोडवण्यासाठी राबवलेल्या ‘ऑपरेशन उपलब्ध’ मध्ये 62 गुन्हे नोंदवून 74 दलालांना बेड्या ठोकल्या. प्रवाशांच्या सामानावर डल्ला मारणार्‍या 376 सराईत गुन्हेगारांना पकडून आरपीएफने लोहमार्ग पोलिसांच्या स्वाधीन केले. नवीन भारतीय न्याय संहिता आणि रेल्वे कायद्यातील तरतुदींनुसार या सर्व गुन्हेगारांवर गुन्हे दाखल करण्यात आले आहेत.