सिने दिग्दर्शक रोहित शेट्टीच्या घरावर गोळीबार ; बिश्नोई गँगशी संबंधित पाच आरोपींना बेड्या
मुंबई (2 फेब्रुवारी 2026) : प्रसिद्ध सिनेदिग्दर्शक रोहित शेट्टीच्या जुहू येथील ‘शेट्टी टॉवर’ या निवासस्थानावर शनिवारी मध्यरात्री झालेल्या गोळीबार प्रकरणी मुंबई गुन्हे शाखा आणि पुणे पोलिसांच्या संयुक्त मोहिमेत पुण्याच्या कर्वेनगर आणि धायरी परिसरातून पाच संशयितांना अटक करण्यात आली.. या हल्ल्याची जबाबदारी कुख्यात लॉरेन्स बिश्नोई गँगशी संबंधित शुभम लोणकरने स्वीकारली आहे.
हा तर केवळ ट्रेलर
रविवार, 1 फेब्रुवारी 2026 रोजी मध्यरात्री 12:45 च्या सुमारास दोन दुचाकीस्वार हल्लेखोरांनी ‘शेट्टी टॉवर’च्या दिशेने पाच राउंड गोळीबार केला. यातील एक गोळी पहिल्या मजल्यावरील जिमच्या काचेला लागली. घटनेनंतर काही वेळातच शुभम लोणकर याने सोशल मीडियावर या हल्ल्याची जबाबदारी स्वीकारत, हा केवळ ट्रेलर आहे, आमच्या कामात हस्तक्षेप करू नका, अशी धमकी दिली.
तांत्रिक विश्लेषणाअंती आरोपी जाळ्यात
मुंबई गुन्हे शाखेच्या 12 पथकांनी तांत्रिक विश्लेषण आणि सीसीटीव्ही फुटेजच्या आधारे या प्रकरणाचे पुणे कनेक्शन शोधले. कारवाईत पुण्याच्या कर्वेनगर येथील मावळे आळीत राहणारा अमन आनंद मारोते (27) आणि गल्ली क्र. 2 मधील आदित्य ज्ञानेश्वर गायकवाड (19) याला, तसेच धायरी परिसरात आम्रपाली बिल्डिंगमध्ये राहणारा सिद्धार्थ दीपक येनपुरे (20) आणि रायकर मळा येथील समर्थ शिवशरण पोमाजी (18) यालाही अटक केली आहे. यासह पुणे शहरातून स्वप्निल बंडू सकट (23) यालाही ताब्यात घेतले आहे. प्राथमिक चौकशीत या तरुणांनी गोळीबाराच्या कटात प्रत्यक्ष सहभाग असल्याची कबुली दिली.
