खिर्डी, ता.रावेर (21 मार्च 2026) : चिनावल, ता.रावेर येथील रहिवासी शेख अल्ताफ शेख मुंशी यांचा नातू आणि शेख अखलाक शेख अल्ताफ यांचा अवघ्या सात वर्षांचा सुपुत्र शेख मोहम्मद अख्लाक शेख याने यंदाच्या पवित्र रमजान महिन्यात आपल्या अटळ जिद्दीचा परिचय देत संपूर्ण महिन्याचे सर्व रोजे अत्यंत यशस्वीरीत्या पूर्ण केले.
रणरणत्या उन्हाची तमा न बाळगता आणि वयाने लहान असूनही आपल्या प्रबळ इच्छाशक्तीच्या जोरावर या चिमुकल्याने दाखवलेला हा संयम खरोखरच कौतुकास्पद ठरला आहे. शेख मोहम्मदला त्याचे चुलते शेख अजमल, शेख अफजल, शेख अनिस आणि शेख यादेहक यांचे मोलाचे प्रोत्साहन लाभले. त्याच्या या धार्मिक धडाडीचे संपूर्ण परिसरातून अभिनंदन होत आहे. लहान वयातच कडक शिस्तीचे पालन करत त्याने पूर्ण केलेले हे रोजे त्याच्या जिद्दीचे प्रतीक मानले जात आहे. चिनावल पंचक्रोशीत या बालकावर कौतुकाचा वर्षाव होत आहे.
