बडनेरा-भुसावळ रेल्वे विभागाची महाव्यवस्थापकांकडून सखोल पाहणी
प्रवासी सुविधा, सुरक्षा व्यवस्था आणि विकासकामांचा घेतला आढावा; अधिक दर्जेदार सेवांसाठी दिल्या सूचना
In-depth Inspection of Badnera-Bhusawal Railway Division by General Manager भुसावळ (22 मे 2026) : मध्य रेल्वेचे महाव्यवस्थापक राजीव श्रीवास्तव यांनी गुरुवार, 21 मे 2026 रोजी बडनेरा ते भुसावळ रेल्वे विभागाची व्यापक पाहणी करून प्रवासी सुविधा, सुरक्षा व्यवस्था तसेच सुरू असलेल्या विविध विकासकामांचा सविस्तर आढावा घेतला. यावेळी विभागीय रेल्वे व्यवस्थापक पुनीत अग्रवाल यांच्यासह रेल्वेचे वरिष्ठ अधिकारी उपस्थित होते.
दौर्यादरम्यान महाव्यवस्थापकांनी बडनेरा, नवी अमरावती, मूर्तिजापूर, शेगाव आणि भुसावळ रेल्वे स्थानकांना भेट देत तेथील सुविधा आणि कामकाजाची प्रत्यक्ष पाहणी केली. बडनेरा येथे क्रू लॉबी, रनिंग रूम तसेच प्रवाशांसाठी उपलब्ध सुविधांचे निरीक्षण करून त्या अधिक सक्षम, आधुनिक आणि गुणवत्तापूर्ण करण्याच्या सूचना संबंधित अधिकार्यांना देण्यात आल्या.
नवी अमरावती स्थानकावर सुरू असलेल्या स्टेशन विकासकामांचा, स्वच्छता व्यवस्थेचा आणि प्रवासी सुविधांचा आढावा घेण्यात आला. तसेच स्थानक परिसरातील सुविधा अधिक प्रभावी करण्यावर भर देण्यात आला.
महाव्यवस्थापकांनी बडनेरा ते भुसावळ दरम्यान विंडो ट्रेलिंगद्वारे रेल्वे मार्गाचे निरीक्षण केले. यावेळी रेल्वे मार्गाची स्थिती, सिग्नल यंत्रणा, सुरक्षा उपाययोजना, स्थानकांवरील स्वच्छता, प्रवासी सुविधा आणि इतर पायाभूत सुविधांची तपशीलवार पडताळणी करण्यात आली.
मूर्तिजापूर येथे स्टेशन परिसराची पाहणी केल्यानंतर त्यांनी ‘रुद्र – हॉस्पिटल ऑन व्हील्स’ अंतर्गत आयोजित वैद्यकीय शिबिरास भेट दिली. शिबिरात उपलब्ध आरोग्य सेवा व वैद्यकीय सुविधांची माहिती घेत रेल्वे कर्मचारी आणि नागरिकांना अधिक प्रभावी आरोग्य सुविधा उपलब्ध करून देण्याबाबत संबंधित अधिकार्यांना निर्देश दिले.
शेगाव स्थानकावरही महाव्यवस्थापकांनी स्टेशन विकासकामे, स्वच्छता आणि प्रवासी सुविधांची पाहणी करून त्याबाबत आवश्यक सूचना दिल्या.
दौर्याच्या अखेरीस भुसावळ येथील आरओएच (रोलिंग ओव्हरहॉल) डेपोचे निरीक्षण करण्यात आले. यावेळी तांत्रिक कामकाज, डब्यांच्या देखभाल प्रक्रिया, सुरक्षा उपाययोजना आणि कार्यक्षमतेबाबत सविस्तर आढावा घेण्यात आला. रेल्वे सेवा अधिक सुरक्षित, दर्जेदार आणि प्रवाशाभिमुख करण्यासाठी आवश्यक सुधारणा राबविण्यावर महाव्यवस्थापकांनी विशेष भर दिला.
