भुसावळातील टवाळखोरांचा दामिनी पथक करणार बंदोबस्त : शाळा-महाविद्यालय परिसरात धडक मोहिम

शाळा-महाविद्यालयाच्या आवारात गस्त
बाजारपेठ पोलीस ठाण्याच्या महिला पोलीस उपनिरीक्षक भारती काळे व त्यांच्या पथकाने शाळा-महाविद्यालय परिसरात उपस्थित राहून विद्यार्थी-विद्यार्थिनींशी संवाद साधला. विद्यार्थ्यांच्या सुरक्षेशी संबंधित विविध बाबींवर चर्चा करत त्यांना आवश्यक त्या सूचना देण्यात आल्या.तसेच शाळा व महाविद्यालय परिसरात टवाळखोरी करणार्‍या तसेच विद्यार्थ्यांना त्रास देणार्‍या व्यक्तींवर वचक बसावा यासाठी विशेष गस्त घालण्यात आली. प्रतिबंधात्मक उपाययोजनांद्वारे सुरक्षित वातावरण निर्माण करण्यावर भर देण्यात आला.

यावेळी विद्यार्थ्यांना आणीबाणीच्या प्रसंगी मदतीसाठी उपलब्ध असलेल्या पोलीस हेल्पलाईन क्रमांकांची तसेच तक्रार निवारण यंत्रणेची माहिती देऊन जागरूक करण्यात आले. विद्यार्थ्यांच्या सुरक्षिततेसाठी, त्यांच्या शैक्षणिक प्रगतीस पोषक वातावरण निर्माण करण्यासाठी आणि समाजात सुरक्षिततेची भावना वृद्धिंगत करण्यासाठी जळगाव जिल्हा पोलीस दल कटिबद्ध असल्याचा संदेश या मोहिमेद्वारे देण्यात आला.