भुसावळातील ‘माउली प्लाझा’मध्ये पाण्याची चोरी : माहिती अधिकारात बाब उघड

विद्युत मोटर लावून पाण्याचा उपसा!
नगरपरिषदेच्या कागदपत्रांवर हे कनेक्शन अस्तित्वातच नसले, तरी प्रत्यक्ष जागेवर मात्र परिस्थिती अत्यंत गंभीर आहे. या इमारतीमध्ये बेकायदेशीरपणे नळ जोडणी करून थेट विद्युत यंत्र (मोटर) बसवण्यात आली असून त्याद्वारे हजारो लिटर पाण्याचा उपसा सुरू आहे. प्रत्यक्ष जागेवरील छायाचित्रांमुळे (जीपीएस लोकेशनसह) हा चोरीचा प्रकार रंगेहात पकडला गेला आहे.

प्रशासनाचा महसूल बुडाला, दोषींवर गुन्हे कधी?
एकीकडे प्रामाणिक कर भरणारे भुसावळकर पाशवी पाणीटंचाईचा सामना करत आहेत, तर दुसरीकडे बिल्डर आणि रॅकेट चालवणार्‍यांकडून प्रशासनाला चुना लावला जात आहे. अधिकृत मंजुरी नसताना ही विद्युत मोटर आणि पाईपलाईन कोणी जोडली? पाणी पुरवठा विभागाचे याकडे दुर्लक्ष का होते? असे अनेक सवाल आता उपस्थित होत आहेत.

कारवाई न झाल्यास आंदोलन
हा थेट भुसावळ नगरपरिषदेच्या मालमत्तेवर पडलेला दरोडा असून यामुळे शासनाचा लाखो रुपयांचा महसूल बुडाला आहे. या प्रकरणी दोषींवर फौजदारी गुन्हे दाखल करून सदर अनधिकृत कनेक्शन तात्काळ कापण्यात यावे, अन्यथा जिल्हाधिकारी कार्यालयासमोर तीव्र आंदोलन छेडण्यात येईल, असे तक्रारदार प्रमोद जगन्नाथ पाटील म्हणाले.

आता या उघड झालेल्या पाणी चोरीवर भुसावळ नगरपरिषदेचे मुख्याधिकारी आणि जिल्हाधिकारी प्रशासन काय कडक कारवाई करते, याकडे संपूर्ण भुसावळकरांचे लक्ष लागून राहिले आहे.