मराठी पाऊल पडते पुढे ! लंडनच्या आंतरराष्ट्रीय कला प्रदर्शनात काळखेडाचे पिसुर्वोंचे अग्निपथ पेंटिंग अन् मुंबईचे प्रदीप चंद्रची फोटोग्राफी

जळगाव (3 जुलै 2026) : लंडनच्या ओमनीडे गॅलरीत आंतरराष्ट्रीय कला प्रदर्शन सुरू आहे. जगभरातील 23 कलाकारांना या प्रदर्शनात निमंत्रित करण्यात आले आहे. त्यात महाराष्ट्रातून जामनेर तालुक्यातील काळखेडाचे चित्रकार जितेंद्र सुरळकर अर्थात पिसुर्वोंचे अग्निपथ पेंटिंग आणि मुंबईचे ज्येष्ठ छायाचित्रकार प्रदीप चंद्र यांच्या फोटोग्राफीला संधी मिळाली. हे प्रदर्शन 23 जुलैपर्यंत चालणार आहेे.

यंदा खान्देशातून पिसुर्वोंना मानाचे पान
प्रदर्शनाचे क्यूरेशन राधा बिनोद शर्मा यांनी केले आहे. ते युकेतील नोंदणीकृत आयएमए फाउंडेशन आणि भारतातील स्वयंसेवी संस्थेचे संस्थापक आहेत. ही संस्था जागतिक स्तरावरील कलागुणांना प्रोत्साहन देते. समकालीन कला, लुप्तप्राय कला आणि भारतातील आदिवासी कला जतन करण्यासाठी समर्पित आहे. सन 2009पासून भारत आणि युनायटेड किंगडममध्ये या संस्थेतर्फे अनेक सांस्कृतिक व कलाविषयक उपक्रम राबवण्यात आले आहेत. या प्रदर्शनाचा मुख्य उद्देश विविध पिढ्या, संस्कृती आणि देश यांच्यात कलेच्या माध्यमातून सेतू निर्माण करणे हा आहे. आंतरराष्ट्रीय कलाकारांना एका छताखाली आणून त्यांच्या कलाकृतींचे प्रदर्शन भरून संवाद साधला जातो. त्यात यंदा खान्देशातून पिसुर्वोंना मानाचे पान मिळाले.