रावेरात मंगळवारी भव्य रोजगार मेळावा
डॉ.केतकी पाटील फाऊंडेशन व कौशल्य रोजगार उद्योजकता यांचा उपक्रम
जळगाव (रविवार, 9 ऑगस्ट 2026) : सामाजिक बांधिलकी जोपासण्याच्या माध्यमातून डॉ.केतकी पाटील फौंडेशन आणि कौशल्य रोजगार उद्योजकता मार्गदर्शन केंद्र , जळगाव यांच्या संयुक्त विद्यमाने मंगळवार, 11 ऑगस्ट रोजी रावेर येथे भव्य रोजगार मेळाव्याचे आयोजन करण्यात आले आहे. या मेळाव्यात शेकडो युवकांना रोजगार देण्यात येणार असल्याचा मानस आहे.
गोदावरी फाऊंडेशनच्या संचालिका तथा भारतीय जनता पक्ष जळगाव जिल्हा पूर्वच्या जिल्हा सरचिटणीस डॉ.केतकीताई पाटील यांच्या वाढदिवसाचे औचित्य साधून युवकांसाठी रोजगार मेळाव्याचे आयोजन करण्यात आले आहे.
हा मेळावा मंगळवार, 11 ऑगस्ट रोजी सरदार जी.जी.हायस्कूलमधील जिमखाना हॉल येथे सकाळी 10 ते दुपारी 2 या वेळेत होईल. या मेळाव्याचा लाभ दहावी पास ते पदवीधर शिक्षण प्राप्त युवकांना घेता येणार आहे. हा मेळावा सरदार जी.जी.हायस्कूलच्या सहकार्याने आयोजित करण्यात आला आहे.
रावेर शहरासह तालुक्यातील सुशिक्षित बेरोजगार युवकांनी या मेळाव्याचा लाभ घ्यावा, असे आवाहन आयोजकांनी केले आहे.
