यावल शहरात जागतिक आदिवासी दिनानिमित्त काढण्यात आली भव्य रॅली

यावल (सोमवार, 10 ऑगस्ट 2026) : यावल शहरात मोठ्या उत्साहात रविवारी जागतिक आदिवासी दिन साजरा करण्यात आला. या निमित्ताने तडवी कॉलनी भागातून दोन, मनुदेवी मंदिरापासून एक तर पंचायत समिती मधून एक अशा चार ठिकाणावरून भव्य वेगवेगळ्या मिरवणुका करण्यात आल्या. मान्यवरांच्या हस्ते प्रतिमापूजन झाले. रॅलीत आमदार, नगराध्यक्ष, नगरसेवक सह विविध लोकप्रतिनिधींनी सहभाग नोंदवला. सजीव देखाव्यासह काढण्यात आलेली मिरवणुका लक्ष वेधणार्‍या ठरल्या होत्या तर रॅलीत सहभागी समाजबांधवांना अल्पोहाराचे वितरण महसूल विभाग तडवी भिल्ल कर्मचारी संघटना यांच्या वतीने करण्यात आले होते.

विविध संघटनांचा सहभाग
शहरात रविवारी जागतिक आदिवासी दिनाचा उत्साह दिसून आला. यात शहरातील अंकलेश्वर बर्‍हाणपूर राष्ट्रीय महामार्गावर असलेल्या मनुदेवी मंदिरापासून आदिवासी टोकरे, ढोर, महादेव, मल्हार कोळी समाज बांधवांची मिरवणूक निघाली होती. तर तडवी कॉलनी भागातून आदिवासी तडवी भिल्ल उत्सव समिती याच भागातून आदिवासी तडवी भिल्ल एकता मंच संघटना, आदिवासी सेवा मंडळ आसेम संघटना आणि पंचायत समितीच्या आवारातून आदिवासी विकास परिषद या संघटनांच्या माध्यमातून भव्य मिरवणुका काढण्यात आल्या. तत्पूर्वी आदिवासी थोर क्रांतिकारक बिरसा मुंडा, तंट्या भिल्ल सह आदिवासी क्रांतीकारक थोर विभुतींच्या प्रतिमेचे पूजन करण्यात आले.