पारोळा तालुक्यातील भूमिपूत्राला शासकीय इतमामात साश्रू नयनांनी अखेरचा निरोप

अंत्यदर्शनार्थ गर्दी
शहीद लान्स नायक रोहित पाटील यांचे पार्थिव शुक्रवार, 4 सप्टेंबर रोजी सायंकाळी 5.30 वाजता लष्करी वाहनातून त्यांचे पार्थिव त्यांच्या मूळ गावी कोळपिंप्री, ता. पारोळा, जि. जळगाव येथे आणण्यात आले. पार्थिव गावात दाखल होताच कुटुंबीय, नातेवाईक, ग्रामस्थ तसेच पंचक्रोशीतील नागरिकांनी अंत्यदर्शनासाठी मोठी गर्दी केली. भारतमातेच्या या वीर सुपुत्राला अखेरचा निरोप देताना उपस्थितांचे डोळे पाणावले होते. अमर रहे, अमर रहे शहीद जवान अमर रहे, भारत माता की जय अशा घोषणा ग्रामस्थांनी दिल्या.

पालकमंत्र्यांची भेट
यावेळी पालकमंत्री गुलाबराव पाटील यांनी शहीद वीर जवान लान्स नायक रोहित पाटील यांच्या पार्थिवावर पुष्प चक्र अर्पण केले, आमदार अनिल पाटील, जिल्हाधिकारी रोहन घुगे यांनी पुष्प चक्र अर्पण केले. त्यानंतर पालकमंत्री पाटील यांनी शहीद जवान यांच्या कुटुंबीयांची भेट घेऊन त्यांचे सांत्वन केले. सायंकाळी सात वाजेच्या दरम्यान शहीद लान्स नायक रोहित पाटील यांच्या पार्थिवावर शासकीय इतमामात अंत्यसंस्कार करण्यात आले. यावेळी पारोळा पोलीस दलाच्या वतीने सलामी देण्यात आली तसेच भारतीय सैन्य दलाच्या जवानांनी मानवंदना देत शाहिद वीर जवानाला अखेरची सलामी दिली.

यांची होती उपस्थिती
याप्रसंगी जिल्हा सैनिक कल्याण अधिकारी मेजर निलेश पाटील,पारोळा तहसीलदार उल्हास देवरे, सैनिक कल्याण संघटक विश्वनाथ उगले, परिसरातील, स्थानिक लोकप्रतिनिधी,जिल्हा सैनिक कल्याण कार्यालयाचे अधिकारी, प्रशासकीय अधिकारी, लष्करी अधिकारी, पोलीस अधिकारी, एन. सी सी,सैनिक शाळेचे विध्यार्थी,ग्रामस्थ आणि पंचक्रोशीतील नागरिक मोठ्या संख्येने उपस्थित होते.

पारोळा तालुक्यावर शोककळा
शहीद लान्स नायक रोहित पाटील यांच्या बलिदानाने कोळपिंप्रीसह संपूर्ण पारोळा तालुक्यावर शोककळा पसरली आहे. देशसेवेसाठी प्राणांचे सर्वोच्च बलिदान देणार्‍या या वीर जवानाच्या शौर्याला आणि त्यागाला जिल्हावासीयांच्या वतीने भावपूर्ण अभिवादन करण्यात आले.