जिल्हास्तरीय मनपा कॅरम स्पर्धेत दुर्गेश्वरी धोंगडे विजेती !

जळगाव (मंगळवार, 13 ऑक्टोबर 2026) : जिल्हा क्रीडा अधिकारी कार्यालयातर्फे आयोजित जिल्हास्तरीय 17 वर्षांखालील मनपा कॅरम स्पर्धेत विद्या इंग्लिश स्कूलची विद्यार्थिनी दुर्गेश्वरी योगेश धोंगडे हिने उत्कृष्ट खेळाचे प्रदर्शन करीत विजेतेपद पटकावले. तिने स्पर्धेतील पाचही प्रतिस्पर्ध्यांना 25-0 अशा फरकाने पराभूत करीत आपले वर्चस्व सिद्ध केले. या उल्लेखनीय कामगिरीबद्दल तिला चषक देऊन गौरविण्यात आले.

ही स्पर्धा 11 ऑक्टोबर रोजी कांताई सभागृहात पार पडली. या स्पर्धेत विविध शाळांमधील 64 खेळाडूंनी सहभाग नोंदविला होता. दुर्गेश्वरीने पहिल्या फेरीत श्रुष्टी शिंपी तर पुढील फेरीत गोजराणी बोडबडे आणि दिव्या गायकवाड यांच्यावर मात केली. उपांत्य फेरीत आयशा शेख हिला पराभूत करीत तिने अंतिम फेरीत प्रवेश केला. अंतिम सामन्यात श्रावणी मोरे हिला पराभूत करून दुर्गेश्वरीने विजेतेपदावर आपले नाव कोरले.