राज्यस्तरीय वेटलिफ्टिंग स्पर्धेत थोरगव्हाणच्या देशमुख विद्यालयातील योगराज सपकाळेला कांस्यपदक

थोरगव्हाण, ता.रावेर (शुक्रवार, 16 ऑक्टोबर 2026) : दि एज्युकेशन सोसायटी संचलित डी.एस.देशमुख विद्यालयाचा इयत्ता अकरावीचा होतकरू खेळाडू योगराज रवींद्र सपकाळे याने राज्यस्तरीय वेटलिफ्टिंग (वेटलिफ्टिंग) स्पर्धेत चमकदार कामगिरी करत कांस्यपदक पटकावले आहे.

विद्यालयाच्या शिरपेचात मानाचा तुरा
अमरावती येथील तपोवनात झालेल्या शालेय राज्यस्तरीय वेटलिफ्टिंग स्पर्धेत 17 वर्षे वयोगट व 65 किलो वजन गटात योगीराजने अत्यंत चुरशीची झुंज देत तृतीय क्रमांक पटकावून हे यश संपादन केले. त्याच्या या यशामुळे विद्यालयाच्या आणि परिसराच्या शिरपेचात मानाचा तुरा रोवला गेला आहे. योगराजला विद्यालयाचे क्रीडा शिक्षक जे.ए. चौधरी तसेच सूर्या व्यायाम शाळेचे संचालक व क्रीडा शिक्षक अविनाश महाजन सर यांचे मोलाचे मार्गदर्शन लाभले.