शिरपूर पोलिसांची मोठी कारवाई ; गावठी कट्टा व तीन जिवंत काडतुसांसह अंबडचा तरुण जाळ्यात

शिरपूर (सोमवार, 19 ऑक्टोबर 2026) : सोशल मिडीयातील रिल्सला भुलून उच्च शिक्षण घेणार्‍या तरुणाने शस्त्र तस्करीसाठी कुख्यात उमर्टी गाठून गावठी कट्टा व तीन जिवंत काडतूस खरेदी केले मात्र शिरपूर तालुका पोलिसांना माहिती कळताच आरोपी तरुणाला अटक करण्यात आली. चेतन आप्पासाहेब वाघमारे (23, रा.रोहिलागड, ता.अंबड, जि.जालना) असे अटकेतील आरोपीचे नाव आहे. तरुणाकडून एक गावठी कट्टा (पिस्तूल) आणि तीन जिवंत काडतुसे जप्त करण्यात आली.

गोपनीय माहितीच्या आधारे कारवाई
शनिवार, 17 ऑक्टोबर 2026 रोजी शिरपूर तालुका पोलीस ठाण्याचे प्रभारी अधिकारी पोलीस निरीक्षक जयपाल हिरे यांना हाडाखेड गावाच्या पुढे सुळे फाटा परिसरात एक संशयीत गावठी कट्टा बाळगून असल्याची माहिती कळताच त्यांनी पथकाला निर्देश दिले. पथकाने संशयीताला ताब्यात घेत त्याची झडती घेतल्यानंतर 25 हजार रुपये किंमतीचा गावठी कट्टा (पिस्तूल) मॅगझिनसह आणि तीन हजार रुपये किंमतीची तीन जिवंत काडतुसे मिळून 28 हजार रुपयांचा मुद्देमाल जप्त करण्यात आला.