भुसावळात डिग्री व शिक्षणाविनाच थाटला दवाखाना : मुन्नाभाई डॉक्टरला बेड्या

Bhusawalt hospital opened without degree and education: Munnabhai doctor shackled भुसावळ : कुठलीही वैद्यकीय पदवी तसेच शिक्षण नसताना विनापरवानगी आयुर्वेदिक दवाखाना टाकून नागरीकांच्या आरोग्याशी खेळ मांडणार्‍या तोतया मुन्नाभाई डॉक्टरला नाशिक आयजींच्या विशेष पथकाने छापा टाकून बेड्या ठोकल्या आहेत. शहरातील बसस्थानकाजवळील सुरभी कॉम्प्लेक्समध्ये मंगळवार, 7 रोजी रात्री उशिरा झालेल्या कारवाईने बोगस डॉक्टरांच्या तंबूत घबराट पसरली आहे तर बोगस डॉक्टरांचा प्रश्न पुन्हा ऐरणीवर आला आहे. शमशेर शेख कादीर शेख (41, प्लॅट क्रमांक 111, पहिला मजला, झैबुनिसा अपार्टमेंट, दर्गा मशीदरोड, कौसा, मुंब्रा, ठाणे) असे अटकेतील आरोपीचे नाव आहे. विशेष म्हणजे यापूर्वीदेखील या मुन्नाभाई डॉक्टराविरोधात मुंबईत अशाच पद्धत्तीचा एक गुन्हा दाखल असल्याची माहिती पोलीस सूत्रांनी दिली.

सापळा रचून केली अटक
शहरातील शिवाजी नगराजवळील सुरभी कॉम्प्लेक्समध्ये तोतया डॉक्टरांकरवी आयुवेर्दिक उपचार होत असल्याची गोपनीय माहिती नाशिक परीक्षेत्राचे विशेष महानिरीखक डॉ.बी.जी.शेखर पाटील यांना मिळाल्यानंतर त्यांनी कारवाईचे आदेश दिले होते. पथकातील वरीष्ठ निरीक्षक बी.जी.रोहोम व सहकार्‍यांनी आरोग्य विभागातील पथकाला सोबत घेत मंगळवारी सायंकाळी संशयीत समशेर शेख याच्या सागर आयुर्वेदिक दवाखान्यात पोलीस कर्मचार्‍याला आजाराचा बहाणा करून पाठवल्यानंतर संशयीताने नाडी परीक्षण करीत तुम्हाला शारीरीक कमजोरी आल्याने त्यावर उपचार करावे लागतील व त्यासाठी 12 हजार रुपये खर्च येईल, असे सांगून विश्वास संपादन केला व सुरूवातीला त्यासाठी काही गोळ्या देतो, असे सांगून गोळ्या दिल्या व रुग्ण बनून आलेल्या कर्मचार्‍याने पाचशे रुपये दिल्यानंतर पथकाला सिग्नल देताच संशयीताच्या मुसक्या बांधण्यात आल्या.