यावलच्या तरुणाची लग्नाच्या बहाण्याने फसवणूक : नाशिकच्या दाम्पत्याला अटक तर वधू मात्र अद्यापही पसारच

Yawal youth cheated on the pretext of marriage : Nashik couple arrested, bride still at large यावल : शहरातील एका 33 वर्षीय तरुणाची दलालांमार्फत लग्न लावून देत पाच जणांनी तीन लाख 37 हजारात फसवणूक केली होती. या गुन्ह्यातील दोन संशयीतांना आधी तर आता पुन्हा नाशिक येथील एका दाम्पत्यास पोलिसांनी अटक केली. त्यांना येथील न्यायालयात हजर केले असता दोघांना 17 फेब्रुवारीपर्यंत पाच दिवसांची पोलिस कोठडी सुनावण्यात आली तर गुन्ह्यातील नववधूचा शोध पोलिस घेत आहेत.

आतापर्यंत चौघांना अटक
यावल शहरातील रहिवासी बबलू जयप्रकाश गर्गे (33) या तरुणास विवाहाकरीता दलालांनी मुलगी मिळवून देतो सांगत त्याची नववधूसह पाच जणांनी तीन लाख 37 हजारात फसवणूक केली. या प्रकरणी यावल पोलिसात पाच जणांविरूध्द गुन्हा दाखल करण्यात आला. या गुन्ह्याच्या तपासात पोलिसांनी आधी बर्‍हाणपूर येथून अशोक सुधाकर जरीवाले (60) तर अहमदनगर जिल्ह्यातील कोपरगाव येथून शीला बाळू सोनवणे उर्फ शीला साईनाथ अनर्थे-पाटील या दोघांना अटक केली होती.