Free sand distribution to Gharkul beneficiaries begins in Thoragavhan यावल (23 मे 2025) : महाराष्ट्र शासनाच्या घरकूल लाभार्थ्यांसाठी सुरू करण्यात आलेल्या मोफत वाळू योजनेला यावल तालुक्यातील थोरगव्हाण येथून 23 मे रोजी औपचारिक सुरुवात करण्यात आली. घरकूल मंजूर झालेल्या लाभार्थींना पाच ब्रास वाळू मोफत देण्यात येणार आहे. या उपक्रमामुळे गोरगरिबांचे घर बांधण्याचे स्वप्न साकार होण्यास मदत होणार आहे.
पाच ब्रास वाळू मोफत मिळणार
थोरगव्हाण गावातील तापी नदीपात्रात शुक्रवारी घरकुल लाभार्थ्यांसाठी मोफत वाळू वितरण कार्यक्रम घेण्यात आला. घरकुल मंजूर लाभार्थ्यांना येथून पाच ब्रास वाळू दिली जाणार आहे. या योजनेसाठी घरकूल मंजूर असलेले लाभार्थी पात्र असून महसूल विभागाकडून त्यांच्या नावाने अधिकृत पास देण्यात येणार आहे. शासनाच्या निर्देशानुसार रॉयल्टी आकारली जाणार नसली तरी रेती वाहतूक व छाननी खर्च लाभार्थ्याने स्वतः करावा लागणार आहे. वाळूचा वापर फक्त लाभार्थ्याच्या घरबांधणीसाठीच करता येणार असून, पास वर नमुद केलेल्या ठिकाणीच वाळू पोहचण्यासाठी मुभा आहे.
यांची होती उपस्थिती
मोफत वाळू वाटप योजनेच्या कार्यक्रमा प्रसंगी यावल पंचायत समितीचे सहायक गटविकास अधिकारी बी.के.पवार, यावल तहसीलदार मोहनमाला नाझीरकर, नायब तहसीलदार अतुल गांगुर्डे, मंडळाधिकारी सचिन जगताप, तलाठी विजयसिंग पाटील, सरपंच मनिषा समाधान सोनवणे, उपसरपंच लताबाई पाटील, पोलिस पाटील गजानन चौधरी, ग्रामसेवक जय कोळी, कोतवाल विजय भालेराव, ग्रामपंचायत सदस्य सुर्यभान पाटील, सामाजिक कार्यकर्ता समाधान सोनवणे, बाळू पाटील व रेती वाहतूक व्यावसायीक उपस्थित होते. थोरगव्हाण गावांमध्ये एकूण सुमारे 86 घरकूल मंजूर झाल्याने आज प्रत्यक्ष सहा लाथार्थींना वाळू वाटप करण्यात आली. योजनेचा लाभ मोठ्या प्रमाणावर अपेक्षित आहे.
