मध्य महाराष्ट्र, विदर्भ आणि मराठवाड्यात संततधार पावसाचा इशारा

कोकण विभागात सर्वात आधी मान्सून दाखल होतो. यंदाही त्याला अपवाद नाही. मान्सूनचा सर्वप्रथम प्रवेश केरळ मार्गे झाला आणि त्यानंतर तो गोवा ओलांडून 9 जूनच्या सुमारास सिंधुदुर्ग व रत्नागिरी जिल्ह्यात पोहोचला.

नाशिक, पुणे, नगर, सातारा, कोल्हापूर आणि सोलापूर या जिल्ह्यांमध्ये ही मान्सूनचा प्रभाव जाणवू लागला आहे. अनेक ठिकाणी हलक्या ते मध्यम स्वरूपाचा पाऊस पडत असून काही भागांत जोरदार पावसाची नोंद झाली आहे. कोल्हापूर जिल्ह्यात राधा नगरी व पंचगंगा परिसरात पावसाने दमदार हजेरी लावली आहे. नाशिकमध्ये गंगापूर धरण परिसरात जोरदार पाऊस झाल्याने पाणी साठ्यात वाढ होण्यास सुरुवात झाली आहे. पुणे जिल्ह्यात जुन्नर, आंबेगाव भागात शेतकर्‍यांनी पेरण्या सुरू केल्या असून कृषी विभागाने काळजीपूर्वक टप्प्याटप्प्याने पेरणीचा सल्ला दिला आहे.