There will be heavy rain in Maharashtra for the next two days! मुंबई (24 जून 2025) : आगामी सलग दोन दिवस महाराष्ट्रात मुसळधार पावसाचा इशारा भारतीय हवामान विभागाने दिला आहे. विशेषतः मुंबई, ठाणे, पालघर, रायगड, रत्नागिरी, सिंधुदुर्ग तसेच पुणे, घाटमाथा, सातारा, कोल्हापूर आणि मराठवाडा व विदर्भात मध्यम ते जोरदार पावसाचा अंदाज आहे.
विदर्भ विभागात नागपूर, अमरावती, चंद्रपूर, यवतमाळ या जिल्ह्यांत मंगळवारी आणि बुधवारी मुसळधार पावसाचा इशारा देण्यात आला आहे. विदर्भात ढगाळ वातावरण राहील. सकाळी काही ठिकाणी विजांसह मध्यम ते जोरदार पावसाची शक्यता आहे.
मुंबईमध्ये पुढील सलग पाच दिवस समुद्राच्या लाटा मोठ्या प्रमाणात वाढणार असल्याने किनारी भागांतील रहिवासी व पर्यटकांनी समुद्रकिनार्यावर जाणे टाळावे. प्रशासन व बचाव दल सजग आहेत, पण प्रत्येकाची स्वतःची सुद्धा जबाबदारी आहे, सुरक्षित राहणे आणि सागरापासून लांब राहण्याचे आवाहन प्रशासनाच्या वतीने करण्यात आले आहे.
हवामान विभागाच्या इशारा
मुंबईसाठी यलो अलर्ट : आगामी 26 जून पर्यंत मुसळधार पावसाची शक्यता आहे; समुद्रकिनारी लाटांपासून सावध राहण्याचा इशारा तसेच चेतावणी देण्यात आली आहे.
कोकण आणि पश्चिम महाराष्ट्र : रायगड, रत्नागिरी, सिंधुदुर्ग, पुणे, सातारा, कोल्हापूर या जिल्ह्यांमध्ये ऑरेंज अलर्ट जाहीर करण्यात आला आहे.
विदर्भातील नागपूर व इतर भागांसाठी : दरम्यान अनेक भागांत अतिजोरदार पावसाचा अंदाज असून, यलो अलर्ट जारी करण्यात आला आहे.
मराठवाडा : मराठवाड्यामध्ये येत्या 24 तासांत मान्सूनचे सक्रिय वातावरण राहणार आहे. हलक्या ते मध्यम स्वरातील पाऊस शेतकरी व ग्रामस्थांसाठी फायदेशीर ठरेल, पण काही ठिकाणी अचानक जास्त पावसाची शक्यता असल्याने प्रशासनाला दक्ष राहण्याच्या सूचना देण्यात आल्या आहेत.
