शादी डॉट कॉमवर ओळख : मैत्रीनंतर लग्नाचे आमिष दाखवत महिलेला घातला तीन कोटी 60 लाखांचा गंडा
पुणे (26 जून 2025) : ऑनलाईन शादी डॉटवरील ओळख पुण्यातील महिलेला भलतीच महागात पडली. परदेशात डॉक्टर असल्याचे सांगणार्‍या भामट्याने महिलेला तब्बल तीन कोटी 60 लाखात गंडवल्याचा प्रकार समोर आला आहे. या प्रकरणी आंतरराष्ट्रीय महाठगाला पुणे सायबर पोलिसांनी अटक केली असून अभिषेक शुक्ला असे त्याचे नाव आहे व मूळचा लखनऊचा आहे.
असे आहे नेमकं प्रकरण ?
दिल्लीतील एक महिला पुण्यातील खराडी परिसरात वास्तव्याला असताना, तिची ऑनलाईन एका प्रोफाइलवरून ओळख ‘डॉ.रोहित ओबेरॉय’ या नावाने स्वतःला ऑस्ट्रेलियन नागरिक म्हणवणार्‍या व्यक्तीशी झाली. ओळखीनंतर मैत्री, आणि नंतर लग्नाचं आमिष दाखवत आरोपीने महिलेशी जवळीक वाढवली. महिला आणि आरोपी यांनी काही काळ एकत्र वास्तव्यही केलं.
महिलेला तिच्या पहिल्या पतीकडून पाच कोटी रुपयांची पोटगी मिळालेली होती. ती आपल्या व्यवसायासाठी आर्थिक गुंतवणूक करत होती. ही माहिती मिळताच आरोपीने तिचा विश्वास संपादन करून तिचा व्यवसाय आंतरराष्ट्रीय पातळीवर नेण्याचं आमिष दाखवलं. फसवणुकीचा बनाव रचत, आरोपीने इव्हॉन हॅन्दयानी आणि विन्सेंट कुआण या नावांची आडसावली वापरत सिंगापूर व भारतातील बँक खात्यांत वेळोवेळी रक्कम भरायला लावली.
महिलेने एकूण तीन कोटी 60 लाख 18 हजार 540 रुपये वेगवेगळ्या बँक खात्यांमध्ये भरले. काही महिन्यांनंतर आरोपीने बोलणं बंद केलं आणि नंतर त्याचा साथीदार ‘विन्सेंट’ याने मेल करून त्याच्या मृत्यूची बनावट माहिती दिली. यानंतर महिलेच्या लक्षात फसवणूक झाल्याचं आलं.
तांत्रिक विश्लेषणद्वारे पिडीताला फसवणार्‍या व्यक्तीचे डॉ. रोहित ओबेरॉय नसून त्याचे खरे नाव अभिषेक शुक्ला, मूळ राहणार लखनऊ, सध्या राहणार पर्थ, ऑस्ट्रेलिया असे निष्पन्न झाले. तसेच आरोपी हा बाहेरील देशात असल्याची माहिती मिळाल्याने त्याचे नावाचे लुक आउट सर्क्युलर तत्काळ जारी केले असता, 25 जून 2025 रोजी सदर आरोपी सिंगापूरवरून मुंबईला आल्याची खबर मिळताच मुंबई एअरपोर्टवर त्यास ताब्यात घेऊन गुन्ह्याच्या अनुषंगाने अटक केली असून सध्या आरोपी पोलीस कस्टडी रिमांडमध्ये आहे.
पोलिस तपासात समोर आलं आहे की आरोपीने शादी डॉट कॉमवरून एकूण तीन हजार 194 महिलांना मेसेज करून संपर्क साधला होता. त्यामुळे आणखी किती महिलांची फसवणूक झाली आहे, याचा तपास पोलिसांकडून केला जात आहे.
