नाशिक (1 जुलै 2025) : पोहण्याचा मोह अनावर झालेल्या ‘साई’ नावाच्या तीन मित्रांचा बुडून मृत्यू झाला. सोमवारी सकाळी 9 वाजता बिडी कामगार नगर रोडवर एका बांधकाम साइटवर खोदलेल्या खड्ड्यात तिघांचेही मृतदेह एकमेकांना वाचवण्याच्या प्रयत्नात सापडले
बिडी कामगार नगरातील साई हिलाल जाधव (14), साई केदारनाथ उगले (14) आणि साई गोरख गरड (15, सर्व रा. बिडी कामगार नगर) अशी मृतांची नावे आहेत.
हे जिवलग मित्र रविवारी गरडच्या म्हशीच्या गोठ्यावर गेले होते. गायीच्या वासरासोबत खेळले. गंगेवर पोहण्यास जाऊ असे ठरले होते. गरडच्या वडिलांनी घरी लवकर जा, असे बजावले. काही वेळ थांबून चौघे मित्र घरी निघाले. पवन याने आईला सांगितले नव्हते. आई वाट पाहतेय म्हणून तो घरी गेला. तिघे जण शेजारील बांधकाम साईटवर खोदलेल्या खड्ड्यात पोहण्यासाठी उतरले.
तिघे ‘साई’ रविवारी दुपार पासून बेपत्ता होते. रात्री 2 वाजता मिसिंग तक्रार दिली. रात्रभर नातेवाइकांनी तिघांचा पहिणे, त्र्यंबक, सोमेश्वर, गंगापूर धरण, गोदाघाट आदी परिसरात शोध घेतला. मात्र सकाळी तिघांचे मृतदेह साईटवर पाण्यात आढळून आले. अभिषेक गरड यांनी गोठ्या शेजारील बांधकाम साईटवर बघितले असता तिघांचे कपडे सापडले. अग्निशामक दल, पोलिसांनी शोध घेत तिघांचे मृतदेह पाण्यात गाळात रुतल्याचे आढळले. मृतदेह बाहेर काढल्यानंतर पालक व नातलगांनी मृतदेह कवटाळत केलेला आक्रोश काळीज पिळवटून टाकणारा होता.
